"an independent online kurdish website

پێشمەرگەکان: وڵامی حیزبی دێمۆکڕات بە هەرا ساز کردن و شێواندنی قسەکانی خالید عەزیزی دەزانن و دەنووسن: لەم بارەیەوە پرسیار دەخاتە سەر داوا‌و چاوەڕوانیی بەڕێز خالید عەزیزی لە شووڕاکان، نوێنەرانی کورد لە مەجلیسی ئێران‌و، ئەم داوا‌و چاوەڕوانییە دەباتە خانەی خولقاندنی تەوەههوم لە لایەن بەڕێز عەزیزی‌یەوە!

 

دەقی  وڵامەکە

هەراسازکردن‌و شێواندنی قسەکانی سکرتێری گشتیی حیزبی دیموکراتی کوردستان بۆ کام مەبەست؟

کۆمیسیۆنی ڕاگەیاندنی حدکا لە نووسینێک‌ دا لە ژێر ناوی “ڕوونکردنەوە لە سەر قسەکانی ئەم دوایانەی بەڕێز خالید عەزیزی” هەوڵی داوە، لێدوان‌و وتووێژەکانی ئەم دوایانەی سکرتیری گشتیی حیزبی دیموکراتی کوردستان، وەک دژکردەوە بەرامبەر پەیامی نەورۆزیی بەڕێز مستەفا هیجری و لە ڕاستای “ڕەواندنەوەی نیگەرانیی کۆماری ئیسلامی”‌و “تێک شکاندنی ئیرادەی خەلکی کوردستان” بناسێنێ‌و وێرای تەعنەلێدان لە پەیامی نەورۆزیی بەڕێز عەزیزی بۆ خەڵکی ڕۆژهەڵاتی کوردستان، هیوای دەربڕیوە کە بۆچوونەکانی ناوبراو، ڕوانگە‌و بۆچوونی خۆی بن نەک هی حیزبەکەی!

ئاخۆ پەیامی نەورۆزیی ئەمساڵی بەڕێز هیجری، چ بووە کە گوایە بووە بە هۆی دژکردەوە نیشاندانی سکرتێری گشتیی حیزبی دیموکراتی کوردستان؟ بەڕێز هیجری بەڵێنی دا کە لە ساڵی نوێ‌دا هێزی پێشمەرگەی حیزبەکەی بنێرێتەوە نێوخۆی ڕۆژهەڵاتی کوردستان‌و خەباتی چەکداری دەست پێ بکاتەوە. بۆ حیزبی دیموکراتی کوردستان کە لە ١٠ ساڵی ڕابردوو‌دا، کەم ساڵ هەبووە، کادر‌و پێشمەرگەکانی لە زۆر ناوچەی رۆژهەڵاتی کوردستان، زۆر جاریش لە تیم‌و دەستەی گەورە گەورە دا، حوزووریان نەبێ‌و تووشی تێکهەڵچوون لە گەڵ هێزەکانی ڕیژیم‌و پێشوازیی گەرمی خەڵک نەبووبن‌و ته‌نانه‌ت له‌و قۆناغه نوێیه‌ی خه‌باتدا نزیکه‌ی ده که‌س له به‌وه‌جترین فه‌رمانده‌و پێشمه‌رگه‌کانی له نێوخۆی وڵات شه‌هید بوون، دروشم‌و بەڵێنیی گەڕانەوەی لەمەودوای پێشمەرگەکانی حدکا بۆ نێوخۆی رۆژهەڵات، ئەگەر مایەی خۆشحاڵی نەبێ، بۆ چی دەبێ ببێتە مایەی نیگەرانی‌و نیشاندانی دژکردەوەی بەرچاوتەنگانە؟ یەکێک لە تایبەتمەندییەکان‌و یەک لە جیاوازییە گرنگەکانی حیزبی دیموکراتی کوردستان، بەرچاوتەنگ نەبوون‌و پاوانخوازنەبوون‌و ئاماده‌یی نیشاندان بۆ هاوکاری لە گەڵ هێز‌و لایەنەکانی دیکەیە. پاشان نیگەرانی‌لە چی؟و بەرچاوتەنگی بەرامبەر کام پەیام‌و کام بڕیاڕو کام ڕووداو؟ خۆ هێشتا پەیامەکەی بەڕێز هیجری نەگەیشتبووە گوێی زۆر کەس‌و لایەن کە جێگرەکەی‌و ئەندامانی دیکەی دەفتەری سیاسی‌و ڕێبەریی حیزبەکەی، تەنانەت بەڕێز هیجری بۆ خۆشی بە لێدوان‌و ڕوونکردنەوەکانیان لە بارەی ئەو پەیامە، ئەو هیواو دلخۆشییەش کە بە وتەی “روونکردنەوەی کۆمیسیۆنی ڕاگەیاندن”یان لە ئاکامی ئەم پەیامەدا پێک هاتبوو، ڕەواندیانەوە!

قسەکانی ئەم دوایانەی کاک خالیدعەزیزی کە ڕوونکردنەوەکەی حدکا کردوونی بە بیانووی هێرش بۆ سەر ناوبراو، هەر ئەو قسانەن کە پێشتریش لە لایەن بەڕێزیان‌و زۆر جاریش لە زمانی سیماکانی دیکەی ڕێبەریی حیزبی دیموکراتی کوردستانەوە، دووپات بوونەوە. پەرش‌و بڵاویی هێز‌و لایەنە سیاسییەکانی رۆژهەلاتی کوردستان‌و یەکتر تەحەممولنەکردن‌و خۆبواردنیان لە هاوکاری‌و هاوخەباتی لە گەڵ یەکتر، ڕاستییەکە کە حاشای لێ ناکرێ‌و هەر لایەنێک دانی پێ دا نەنێ، تەنیا خۆی فریو دەدا‌و خزمەتێک بە خۆی‌و بە بزووتنەوەی کورد لە ڕۆژهەڵاتی کوردستان ناکا. داننان بەم راستییە تاڵە‌و ڕەخنە لێگرتنی، مەرجی سەرەکییە بۆ بە خۆداچوونەوە‌و هەنگاونان بۆ باشکردنی پێوەندیی لایەنە سیاسییەکان. حیزبی دیموکراتی کوردستان زۆر جار لە بەیاننامە‌و لێدوانی ڕەسمیی خۆی‌دا ڕایگەیاندوە کە خەڵکی ڕۆژهەڵاتی کوردستان ئەو کاتە یەکگرتووانە‌و بە شێوەیەکی جیددی ولامی پەیام‌و بانگەوازی هێز‌و لایەنە سیاسیەکان بۆ گرتنەبەری هەر شێوە خەباتێک دەدەنەوە‌و پێشوازیی لێ دەکەن کە یەکگرتوویی، هاوهەنگاوی‌و هاوخەباتی لە نێوان ئەو هێزو لایەنانە دا ببینن. بەڵام ڕوونکردنەوەکەی حدکا بەو هۆیەوە کە مەبەستێکی نادۆستانەی لە پشتە، هێندێک رستە لە قسەکانی بەڕێز عەزیزی لە سەرجەم قسەکانی هەڵبڕاندوە‌و بێ ئاماژە کردن بە بەستێن‌و نیەت‌و نیازێک کە لە پشت ئەم قسانەوە هەن، دەیانکا بە بەڵگەی “چاندنی تۆوی بێهیوایی لە نێو خەڵک “‌و هتد. ئەمەش جێگای سەرنج‌و تێڕامانە کە “ڕوونکردنەوەی حدکا” ئاماژە کردنی بەڕێز عەزیزی بە کەم کاریگەربوونی خەباتی چەکداری لە حاڵەتی نەبوونی هاوکاری‌و هەماهەنگیی نێوان لایەنەکان بە تایبەتی دوو لایەنی دیموکرات، دەکاتە بنچینەی کۆمەڵێک پرسیار‌و گومانی قورس‌و تاوانبارکردنی سکرتێری حیزبی دیموکراتی کوردستان بە “ڕەواندنەوەی نیگەرانیی کۆماری ئیسلامی”‌و هاندانی خەڵکی کوردستان بۆ “سەربەردانەوە‌و گوێڕایەڵیی ڕێژیمی کۆماری ئیسلامی‌و ڕێنوینییەکانی وەلیی فەقیه”. بەڵام لە بیریان نیە لە کاتی دەست پێکردنەوەی حوزوور‌و چالاکیی هیزی پێشمەرگەی حیزبی دیموکراتی کوردستان لە نێوخۆی ڕۆژهەڵات، لە تەلەڤیزیۆنی “تیشک”ەوە، ئەم جۆرە چالاکیانەیان بە مەترسی دروستکردن بۆ چالاکانی نێوخۆ ناودەبرد‌و نەک هەر لە گەڵ بنەماڵەی شەهیدانی قۆناغی نوێ‌و هاوسەنگەرانیان هاودەردییان نەدەکرد بەڵکوو حاشایان لە دیموکراتبوونی پێشمەرگەکانیش دەکرد!

ڕوونکردنەوەی حدکا” بۆ بەرپەرچدانەوەی ئەو قسەیەی بەڕێز عەزیزی کە پێویستە لە نێوان ئەو لایەنانەی پێشمەرگە دەنێرنەوە نیوخۆی وڵات، هاوکاری‌و هەماهەنگی هەبێ، دەپرسێ ئایا “لایەنەکەی کاک خالید بۆ چالاکیی پێشمەرگانە هیچ هەماهەنگیان …لانیکەم لە گەڵ حدکا کردوە؟” وڵامی ئەو پرسیارە زۆر ڕوونەو هەموو لا دەیزانن. ئەو لایەنەی بەردەوام هاوکاری‌و هەماهەنگیی دوو لایەنەی لە زۆر کار‌و چالاکی‌و بۆنە‌دا رەتکردووەتەوە، یا داوا‌و چاوەڕوانیی نامەنتیقیی هەبووە، “حدکا” بووە نەک حیزبی دیموکراتی کوردستان. ئەگەر بمانەوێ لەم بارەیەوە نموونە بێنینەوە، نموونە یەکجار زۆرن. ئێستاش ئەگەر حدکا، بە راستی هاتووەتە سەر ئەو قەناعەتە کە هەماهەنگی‌و هاوکاری بە تایبەتی لە بواری پێشمەرگایەتی‌دا لە نێوان دوو لایەنی دیموکرات‌دا پێویستە، پێمان وایە بۆ پێشگیری لە هەر ئەگەرێک بە تایبەتی بۆ بەرپەرچدانەوەی پیلانەکانی کۆماری ئیسلامی‌و بۆ پشتگیریی یەکتر لە کاتی پێویستدا، ئەم زەروورەتە چ لە ناوچە سنوورییەکان‌و چ لە نیوخۆی وڵات‌دا، لە هەموو کات زیاترە‌و ئێمە پێشوازیی لێ دەکەین. بە تایبەت کە حیزبی دێموکراتی کوردستان وەک ڕوونکردنەوەکەی راگەیاندنی حدکاش پشتڕاستی کردۆتەوە، خاوەنی کۆمەڵێکی زۆر پێشمەرگە‌و کادری بە ئەزموونە کە لە ماوەی ١٠ ساڵی رابردوودا‌و لە قۆناخی نوێی خەباتدا، ئەزموونێکی زۆر زیاتریان لە حزوور‌و بوون لە ناوخۆی رۆژهەڵاتی کوردستان‌دا وەسەریەک ناوە.

ڕوونکردنەوەی حدکا، هەوڵ دەدا باوەڕی حیزبی دیموکراتی کوردستان بە پێویستیی فرە ڕەهەندبوونی خەبات لە ڕۆژهەڵاتی کوردستان کە لە پەیامی نەورۆزیی بەڕێز خالید عەزیزی‌دا پێی لە سەر داگیراوەتەوە، بەو پرسیار‌و گومانانە گرێ بداتەوە کە داویەتە پاڵ سکرتێری گشتیی حیزبی ئێمە. لەم بارەیەوە پرسیار دەخاتە سەر داوا‌و چاوەڕوانیی بەڕێز خالید عەزیزی لە شووڕاکان، نوێنەرانی کورد لە مەجلیسی ئێران‌و، ئەم داوا‌و چاوەڕوانییە دەباتە خانەی خولقاندنی تەوەههوم لە لایەن بەڕێز عەزیزی‌یەوە! جێگای وەبیر هێنانەوەیە کە کاک خالید عەزیزی لەبەشێکی پەیامی نەورۆزیی خۆی‌دا ڕووی کردبووە نوێنەرانی کورد لە مەجلیس‌و داوای لێکردبوون: “ئەگەر ئەوان لەوێ هەن لە نەتیجەی دەنگی خەڵکی ناوچەکانی خۆیان لەوێ هەن. سەره‌ڕای تەعەهوداتی ناوچەیی، تەعەهوداتی میللی ئەوان ئەوەیە کە دیفاع لە مافە نەتەوایەتییەکانی خۆیان بکەن”. بە راستی بۆ کۆمیسیۆنی راگەیاندنی حیزبێک کە سکرتێرەکەی پەیامی ئاشتەوایی بۆ جاش‌و چەکدارە کوردەکانی سەر بە دامودەزگا سەرکوتکەرەکانی ئەو ڕێژیمە دەنێرێ‌و سەرەڕای ئەو هەموو تاوانەی دەرحەق نەتەوەکەیان‌و بزووتنەوەی شۆڕشگێرانەی کوردستان ئەنجامیان داوە، دەیانبوورێ، بۆ چی خستنە ڕووی ئەم چاوەڕوانیانە لە شووڕاکان‌و نوێنەرانی کوردی مەجلیس، بووە بە هەوێنی تەعنە لیدان‌و گومان بڵاوکردنەوە؟ جگە لەمەش هاندانی خەڵک بۆ ئەوەی کەسانی باش‌و نزیک بە خۆیان بنێرنە نێو شووراکان‌و مەجلیس‌و، ڕێگە نەدەن کۆماری ئیسلامی(بە کەیفی خۆی) بەکرێگیراوانی خۆی بخزێنێتە نێو ئەو جۆرە دامەزراوانە، “ورە بەخشینە بە کۆماری ئیسلامی” یا تێگەیشتنە لە زیندوویی خەڵک‌و ناسینی وزە‌و تواناکانیان‌و، بەکارهێنانی ئەم وزە‌و توانایانە بۆ خەبات لە گەڵ کۆماری ئیسلامی لە مەیدانێکی دیکە‌دا؟ ئەمەش بە جێی خۆی کە ئەم جۆرە سیاسەتکردن‌و هەڵوێستگرتنەش لە مێژووی حیزبی دیموکرات‌دا شتێکی نوێ نیە‌و ئەو کاتەی حیزبی دیموکرات حیزبێکی یەکگرتووش بوو، نموونەی ئەم جۆرە هەڵوێستانە هەبووە. بۆ چی ئەو کات ڕەوا‌و دروست بوون، بەڵام ئێستا دەبنە “هەوێنی بێ قیمەت کردنی خەبات‌و تێکۆشانی هەزاران پێشمەرگەی ڕیزەکانی خەبات”؟

حیزبی دیموکراتی کوردستان هەم لە ڕێگای حوزووری بەردەوامی کادرەکان‌و پێشمەرگەکانی لە نیو خەڵک‌دا‌و هەم لە ڕیگای پێوەندیی بەربڵاوی بە نوخبەکان‌و کەسە دیارەکانی گەلەکەمان، پەیام‌و چاوەروانیی خەڵکی رۆژهەڵاتی کوردستانی زۆر بە دروستی وەرگرتوە. سکرتێری گشتیی ئەم حیزبەش بەردەوام ئەو پەیامەی وەبیر تێکۆشەرانی حیزبەکەی، هەموو دیموکراتەکان‌و لایەنەکانی دیکەش هێناوەتەوە. ئاماژە کردنی بەڕێز عەزیزی بە پەرش‌و بڵاویی دیموکراتەکان‌و هێز‌و لایەنەکانی دیکە‌و رەخنە گرتنی ڕاشکاوانەشی لەم دۆخە، لە گەڵ ئەوەی دەکرێ لە شێوەی دەربڕینیان‌دا ڕەخنە‌و تێبینییش هەڵبگرن، لە ڕاستای وەرگرتنی ئەم پەیامەی خەڵکی ڕۆژهەلات دایە. هیوای ئێمە ئەوەیە بەڕێز کاک مستەفا هیجری‌و ڕێبەریی حدکا بە گشتی، ئەم جۆرە باس‌و لیدوانانە نەکەن بە هەوێنی هەڵپەساردنی باسێکی گرنگتر کە پرسی یەکگرتنەوەی دیموکراتەکانە. وەک حیزبی دیموکراتی کوردستان بە دروستی زۆر جار ئاماژەی پێ کردوە، پێشکەوتنی بزووتنەوەی کورد لە ڕۆژهەلاتی کوردستان بەر لە هەر شتێکی دیکە لە گرەوی یەکتر تەحەممولکردن‌و یەکگرتوویی‌و تەبایی هێز‌و لایەنە سیاسییەکانی ئەو بەشەی کوردستان دایە‌و، یەکگرتنەوەی دیموکراتەکانیش، کلیلی هەموار بوون‌و پێکهاتنی هاوپەیمانیی گەورەتر لە ڕۆژهەڵاتی کوردستانە. با راستییەکان ببینین، دانیان پێدا بنێین‌و هەوڵ بدەین بە دوور لە دەمارگرژی ، خۆبەزلزانی‌و ژیان لە تەوەههوم‌دا ، بکەوینە دیالۆگ‌و چارەسەری کێشەکان‌و بەم جۆرە دۆخێکی نوێ لە گۆڕەپانی سیاسیی ئەو بەشەی کوردستان دا بێنینە ئاراوە.

حیزبی دیموکراتی کوردستان

کۆمیسیۆنی ڕاگەیاندن

١٨ی خاکەلێوەی ١٣٩٥

٦ی ئاوریلی ٢٠١٦

 

 بابەتی پەیوەندی دار

 

دەقی پەیامی نەورۆزی خالید عەزیزی

پەیامی نەورۆزیی خالید عەزیزی ، سکرتێری گیشتی حیزبی دێموکراتی کورستان

هاووڵاتیانی خۆشەویست!

خەڵکی تێکۆشەر و ماندوویی نەناسی رۆژەهەڵاتی کوردستان!

ئەندامان و پێشمەرگەکان و کادرەکانی حیزبی دێموکراتی کوردستان!

 

بە بۆنەی نەورۆز، نەورۆزی ساڵی ١٣٩٥ لە هەموو لایەکتان پیرۆزبایی دەکەم و هیوادارم ساڵی تازە بە دەرس وەرگرتن و ئەزموون وەرگرتن لە ساڵی پێشوو و ساڵانی رابردوو، بە بەشداری و هیمەت و تێکۆشانی هەموو لایەکمان ساڵێکی پڕ نەتیجە بێ بۆ نەتەوەکەمان لە رۆژهەڵاتی کوردستان و هەمووی ئێمە وەک تاک و بنەماڵەی هەموو لایەک. بۆیە من بۆ جارێکی دیکە پیرۆزباییتان لێ دەکەم و هەروەها هیوادارم هەموو لایەکتان لەش‌ساغ بن و هیوادارم هەموولایەکمان بەیەکەوە بەرەوپیری نەورۆزی ساڵی ١٣٩٥ بڕۆین.

ئێمە سەرەڕای زۆر نەهامەتی و ناخۆشی کە بەسەرمان هاتووە، بەڵام هەمیشە نەورۆزمان کە مێژوویەکی کۆنی کوردەواریە، جێژن گرتوەو نەورۆزمان کردوە بە مەیدانێک بۆ دەربڕینی خۆمان و بۆ جێخستنی خواست و داخوازەکانی نەتەوایەتی خۆمان و، بۆ ئەوە کە نیشان بدەین ئێمە وەک نەتەوەی کورد لە کوردستانی ئیران، سەرەڕای زوڵم و زۆری کۆماری ئیسلامی هەرگیز کۆڵ نادەین و بە خۆشی‌یەکانی خۆمان هیوابەخش دەبین بۆ خۆشی زۆرتر بۆ نەوەی داهاتوو.

هەروەها جێگای خۆیەتی بە بۆنەی یەک ساڵ لە خەبات و تێکۆشان و هەوڵی هەموو لایەکمان، ماندوونەبوونی لە ئێوە بکەم؛ لە تێکۆشەرانی سیاسی، مەدەنی، هەمووی ئێوە کە لە بواری جۆراوجۆردا لە نێوخۆی وڵات سەرەڕای زوڵم و زۆری کۆماری ئیسلامی تەحەمموڵی کۆڵێک موشکیلاتتان کردوە، بەڵام هەوڵتان داوە بە حەق لە هەموو فورەسەتەکان کەڵک وەرگرن بۆ ئەوەی کە لە هەر گۆشەیەک و لە هەر جێگایەک فورسەت دێتە گۆرێ، لە پێناو مافەکانی نەتەوایەتی خۆمان و مافەکانی سیاسی و دێموکراتیکی خۆمان کەڵکیان لێ وەربگرن.

 

ئێمە لە حیزبی دێموکرات زۆر بە بایەخەوە دەروانینە ئەوە و، پێمان وایە نەتەوەیەک کە ئاوا بە شێوازی جۆراوجۆر و بە شێوەی فرەڕەهەندی هەم شاخی هەیە و هەم مەیدانی دیپلۆماسی هەیە و هەم خەباتی مەدەنی لە نێوخۆی وڵاتی هەیە و لە هەموو بوارەکان کەڵک وەردەگرێ، نەتەوەیەکی زیندوو و سەری‌حاڵە و، ئێمە ئیفتخار و شانازی دەکەین بە زیندوویی و سەری‌حاڵ بوونی ئێوە لە نێوخۆی وڵات و، دڵنیام لە نەتیجەی خەبات و تێکۆشانی ئێوەدا کۆماری ئیسلامی هەرگیز ناتوانێ ئەو پیلانەی خۆی جێبەجی بکا کە دەیهەوێ قەزییەی رۆژهەڵاتی کوردستان(کوردستانی ئێران) لە پەراوێز بخا. یەک ساڵ خەبات و تێکۆشان لە ساڵی ڕابردوودا ئەوەی درخست.

جێگای خۆیەتی هەموو لایەکمان بۆخۆمان و بۆ یەکتر ئەرک و وەزیفە دابنێین. حیزبی دێموکرات و پێشمەرگەکان و کادرەکانی حیزبی دێموکرات لە ژێر رووناکایی خەباتی فرەڕەهەندی‌دا تێدەکۆشن لە ساڵی داهاتووش‌دا ئەرک و وەزیفەی خۆیان بە جێ‌بگەیێنن. ئەرک و وەزیفەی ئێمە زەمانێک نەتیجە دەدات کە هەموومان بە یەکەوە بە وەحدەتی میللی، جیاواز لەوەی کە ئێمە ئایینی جۆراوجۆرمان هەیە، زاراوەی جۆراوجۆرمان هەیە، ناوچەی جۆراوجۆرمان هەیە، بەڵام دەبێ لە بیرمان بێ زەمانێک بەهێز و بەقەوەتین کە ئێمە وەک یەک نەتەوە، نەتەوەی کورد لە رۆژهەڵاتی کوردستان بەرەوڕووی کۆماری ئیسلامی بینەیە. وەک یەک نەتەوە وەک نەتەوەی کورد سەرەرای هەموو ئەو جیاوازیانە یەک خواست و ویستمان هەبێ ئەویش جێخستنی مافەکانی خۆمانە، کار کردن بۆ مافەکانی خۆمان.

لەو پیناوەدا بێگومان مامۆستایانی ئایینی، مامۆستایانی قوتابخانەکان، فەعالینی سیاسی، فەعالینی مەدەنی، ژینگە پارێزان، هونەرمەندان، فەعالینی ئەدەبی، فەعالینی هونەری هەروەها فەعالینی دیفاع لە مافی مرۆڤ، بە گشتی سەرجەم تێکۆشەرانی خەڵک لە نێوخۆی وڵات، بە ژن و بە پیاو، بە لاو، بەخوێندکاران لە هەر شوێنێک هەن، ئەرک و وەزیفەمان هەیە. دڵنیام ئێمه‌ هه‌موومان به‌ یه‌که‌وه‌ ئه‌و ئه‌رک و وه‌زیفانه‌ که‌ بۆ یه‌کتری داده‌نێین و به‌ یه‌که‌وه‌ بۆخۆمانی داده‌نێین له‌ ئیدامه‌ی خۆی دا، ده‌توانین کاری زۆرتریش بکه‌ین.

هه‌ڵبژاردنی رابردوو ده‌ریخست هه‌موو ئەو جێاوازی و تەنەوعاتی سیاسی که‌ له‌ کوردستان‌دا هه‌مانه،‌ له‌ پیناو و له‌ خزمه‌ت به‌هێزکردنی ماف و داواکانی خۆمانه.‌ بۆیه‌ هیوادارم له‌ داهاتووش دا ئێمه‌ ئه‌وه‌ بکه‌ین به‌ مه‌بنا، بیکه‌ین به‌ بنه‌ما که‌ هه‌رگیز به‌رامبه‌ر به‌و شتانه‌ی له‌ ده‌ور و به‌ری خۆمان تێپه‌ر ده‌بێ بێ‌ته‌فاوت نه‌بین. هه‌وڵدانی ئێمه‌ و جێ‌خستنی لانیکه‌می مافه‌کانمان، بۆخۆی ده‌توانێ سه‌ره‌تایه‌ک بێ بۆ شتی باشتر له‌ داهاتوودا.

هه‌روه‌ها ئه‌رک ده‌خرێته‌ سه‌ر شۆرای شاره‌کان، سه‌ر نوێنه‌رانی کورد له‌ پارلمانی ئێران که‌ له‌وێ نوێنه‌رایه‌تی ناوچه‌کانی خۆیان ده‌که‌ن، ئاوردانه‌وه‌یه‌کیان له‌ ناوچه‌که‌ی خۆیان هەبێ، ئه‌گه‌ر ئه‌وان له‌وێ هه‌ن، له‌ نه‌تیجه‌ی ده‌نگی خه‌ڵکی ناوچه‌کانی خۆیان له‌وێ هه‌ن. سه‌ره‌ڕای ته‌عه‌هوداتی ناوچه‌یی، ته‌عه‌هوداتی میللی‌شیان هه‌یه‌، ته‌عه‌هوداتی میللی ئه‌وان ئه‌وه‌یه‌ که‌ دیفاع له‌ مافه‌ نه‌ته‌وایه‌تی‌یەکانی خۆیان بکه‌ن.

هه‌روه‌ها جێگای خۆیه‌تی به‌بۆنه‌ی نه‌ورۆز و ساڵی تازه‌ له‌ لایەن حیزبی دێموکراتی کوردستانه‌وه‌ بۆ جارێکی دیکه‌ داوا له‌ هەموو لایه‌ک بکه‌ین که‌ یه‌کڕیزی و وه‌حده‌تی میللی خۆیان بپارێزن. وه‌حده‌ت و یه‌کڕیزی ئێمه‌ له‌ نێوخۆی وڵات‌دا، ئه‌وه‌ی که‌ هه‌موو ئوستانه‌ کوردنشینەکان به‌یه‌که‌وه‌ کۆده‌بنه‌وه‌ و له‌سه‌ر ویست و داخوازەکانیان به‌ قه‌ناعه‌ت و ته‌وافوق ده‌گه‌ن، ده‌توانێ سیگناڵێکی باش بێ و، ئا‌درسێکی به‌ قوه‌ت بده‌ین به‌ هه‌موو ئه‌وانه‌ی له‌ تاران به‌ شێوازی خۆیان سه‌یری مه‌سه‌له‌ی کورد ده‌که‌ن. ئه‌گه‌ر ئێمه‌ نه‌توانین به‌ هه‌موو مافه‌کانیشمان بگه‌ین، لانی که‌م ده‌توانین پێیان بڵێین ئێمە یه‌ک نه‌ته‌وه‌ین، له‌سه‌ر داواکانی خۆمان یه‌کگرتووین و ‌له‌ سه‌ر داواکانی خۆمان به‌رده‌وام ده‌چینه‌ پێشێ.

ئێمه‌ له‌ کۆنگره‌ی شا‌زده‌هه‌می حیزب به‌ولاوه،‌ جیاواز لەوە کە له ‌سه‌ر زۆر بابه‌ت ساغ بوونه‌وه‌مان بوه‌ و هه‌وڵ ده‌ده‌ین به‌ خه‌باتێکی فره‌ڕه‌هه‌ندی و هه‌مه‌لایەنه‌ تێبکۆشین هه‌موو تێکۆشه‌رانی نێوخۆی وڵات و ده‌ره‌وه‌ی وڵات و ئه‌و تێکۆشه‌رانه‌ی که‌ له‌ هه‌رێمی کوردستانیشن، به‌شداری پرۆژه‌ی جێ‌خستنی مافه‌کانی خۆمان بین، له‌ ته‌نیشت ئه‌وه‌ش دا مه‌سه‌له‌ی رێفڕاندۆم واته‌ ڕاپرسیمان هێنایە گۆڕێ. ڕاپرسی بۆ کوردستانی ئێران یان رۆژهه‌ڵاتی کوردستان یان ڕێفڕاندۆم ئه‌وه‌یه‌ ئیمه‌ وه‌ک نه‌ته‌وه‌ی کورد له‌ کوردستانی ئێران ئه‌و مافه‌ بۆخۆمان بێڵینه‌وه‌ و هه‌م به‌ ئێرانی‌یەکان چ ئه‌وانه‌ی دۆستمانن و چ ئه‌وانه‌ی باش له‌ قه‌زییه‌ی ئیمه‌ تێ‌ناگه‌ن و چ ئه‌وانه‌ی لێی تێ‌ده‌گه‌ن، به‌ڵام گوێمان ناده‌نێ بڵێین که‌ له‌ ماوه‌ی نزیک به‌ سی و حه‌وت ساڵ خه‌بات و تێکۆشان دا هه‌موو شێوازێکمان له‌ دژی حکومه‌تی مه‌رکه‌زی ئێستا و ته‌نانه‌ت حکومه‌تی پێشووش له‌ رابردوودا به ‌تاقیکردۆته‌وه.

ئه‌گه‌ر رۆژێک له‌ رۆژان هه‌مووی ئه‌و ویست و داخوازیانه‌ی خۆمان به‌ شێوازی موخته‌لیف که‌ هێناومانه‌ و‌ حکومه‌ته‌ مه‌رکه‌زییەکان جواب ناده‌نه‌وه‌ به‌ نه‌تیجه‌ نه‌گه‌ن، خه‌ڵکی کورد له‌ کوردستانی ئێران حه‌قی خۆیه‌تی ئه‌و مافه‌ بۆخۆی بێڵێته‌وه‌، که‌ له‌ چوارچیوه‌ی مه‌یدانی نێوده‌وڵه‌تیش دا قه‌بووڵ کراو ئیعترافی پێکراوه‌ شتێکی ئینسانی و قانوونییه‌، موراجعه‌ به‌ ره‌ئی خه‌ڵکه‌که‌ی خۆی بکا، ریفراندوم بکا، راپرسی بکا، ریفراندوم کردن و راپرسی واتا راگرتنی ئەو ئیدەیە لە نێو خەڵک دا ئەو حەقە بۆ ئیمە دێڵیتەوە هەر زەمانیک فورسەتێکی باش بۆ ئیمە هەڵکەوت ئێمەش بتوانین لەسەر چارەنووسی خۆمان تەسمیم بگرین، لە هەمان کاتیش دا سیگناڵێکی جیددی‌یە بۆ ئەو لایانەی کە تەوجوه بە مافەکانی ئێمە ناکەن کە کورد لە کوردستانی ئێران دەتوانێ فکر لە رێگاچارەی دیکەش بکاتەوە. دڵنیام ئێمە بە هیمەتی هەموو لایەکمان دەتوانین ئەو ئیدەیە، ئەو پرۆژەیە لە کۆمەڵگای نێودەوڵەتیش بێنینیە پیشێ.

یەکێک لە ڕێگاکانی خۆشویستنی خاک و نیشتمان و وڵات ئەوەیە کە وڵات بە پاک و خاوێنی رابگرین، پاک و خاوێنی وڵات فەزایەکی باش دروست دەکا بۆ فکرکردنەوەیەکی خۆش. ئێستا کە ئێوە بەرەو نەورۆز و بەهارێکی خۆش دەچن، لەو تەبیعەت و سروشتە کەڵک وەردەگرن و تێیدادەبن، هیوادارم تەبیعەت و سروشت زۆر پاک و خاوێن ڕابگرن، بۆیە لێرە ئەرکی فەعالینی ژینگە پارێزە کە هەر نەمامێک کە دەیچێنن وا فکر بکەنەوە کە ئەو نەمامانە لە داهاتوودا دەبن بە دارێکی بەقوەت و بەر و بۆمیان بۆ نەوەکانی داهاتوو دەبێ. ژینگەیەک کە پاک و خاوێن بێ، دڵنیام فکری باش و رێک و پێکیشی تێدا جێ دەکەوێ.

بۆیە هیوادارم هەموولایەکمان بە خۆشی‌یەوە بەرەو نەورۆزی ساڵی ١٣٩٥ برۆین و هەموو لایەکمان بە دەربڕینی خۆشی و نەورۆزی کوردەواری، بە لیباسی کوردەواری و بە ئاهەنگ و هەروەها گۆرانی کوردی، بە دەوری یەک بوون لە هەموو ئوستانەکانی کوردنشین، تەنانەت لە نێو کوردەکانی تاران و خوراسانیش بۆ جارێکی دیکە نیشان بدەین ئێمە رۆڵەی میللەتێکین کە سەرەڕای هەموو خۆشی وناخۆشی‌یەکانی، تێدەکۆشێ لە رۆژە خۆشەکان‌دا پەیامی نەتەوایەتی خۆی بگەیەنێ و تێدەکۆشێ لە رۆژی نەورۆز و خۆشی‌یەکانی دەور و بەری نەورۆز، لەسەر وەحدەت و یەکریزی خۆی هەر ئاوا بەردەوام بێ.

 

بۆجارێکی دیکە نەورۆزتان پیرۆز و هەروەها هیوادارم هەموولایەکمان بە ساغی و سڵامەتی بەرەو پیری نەورۆز بچین و لە رۆژی نەورۆز و رۆژەکانی نەورۆز و بەهاردا وەحدەت و یەکریزی خۆمان بەقوەت بکەین، ناخۆشی‌یەکان بسپێرین بە ساڵی ڕابردوو، دڵەکان بە کراوەیی بێڵینەوە بۆ ئەوەی کە هەموو لایەکمان یەکترمان خۆش بوێ. وەحدەت و یەکگرتوویی ئێمە زامنی سەرکەوتوویی ئێمەیە.

هەر ساغ و سڵامەت بن و هیوادارم هەموولایەکمان هەر بەرەو پێش بچین. دڵنیام داهاتوو هێ ئێمەیە. نەتەوەیەک کە لانیکەم لە چوارچێوەی حیزبی دێموکرات دا حەفتا ساڵ کۆڵی نەدابێ، هەموو ئەو خۆشی و ناخۆشی‌یانەی تێپەڕ کردبێ، هیوادارم لە داهاتوودا لاپەرەی زۆر خۆش بەیەکەوە بکەینەوە و هیوادارم ئێمە بە مافەکانی خۆمان بگەین و دڵنیام ئێمە کۆڵ نادەین، ئێوە کۆڵ نادەن و هەموو لایەکمان بەردەوام دەبین لە خەبات و تێکۆشانی خۆمان.

 

هەر شاد و سەرکەوتوو بن.

2016-03-29

…….

دەقی پەیامی بەڕێز کاک مستەفا هیجری:

 هاونیشتمانانی تێکۆشەر !

ئامادەبووانی بەڕێزی ڕێوڕەسمی ئەمساڵی نەورۆزمان !

لە لایەن حیزبی دێموکراتی کوردستانی ئێرانەوە پیرۆزباییەکی گەرم، بە گەرمیی ئاگری نەورۆز پێشکەش بە هەموو ئێوە، بنەماڵەی شەهیدانی ڕێگای ڕزگاریی کوردستان لە چنگ زۆرداری و ملهوری، زیندانیانی سیاسیی سەربەرز کە سەریان لە بەرانبەر ستەم و ئازارەکانی ڕێژیمی کۆماری ئیسلامی‏دا نەوی نەکردووە، کادر و پێشمەرگە و ئەندامان و لایەنگرانی حیزبی دێموکرات و ئێوە بەڕێزان، ئامادەبووانی ڕێوڕەسمی نەورۆزی ئەمساڵمان و هەموو خەڵکی کوردستان دەکەم.

خوشک و برایانی ئازیز !

بە کۆتایی هاتنی ساڵی ١٣٩٤ی هەتاوی، ساڵێکی دیکە لە تەمەنی پڕ لە تاقیکاریی ڕێژیم تێپەڕ بوو، هەر وەک زۆر زووتر پێشبینیمان کردبوو، لەو ساڵەدا دەسەڵاتبەدەستانی کۆماری ئیسلامی، دوای زیاتر لە یەک دەیە پێداگری لەسەر پیتاندنی یورانیوم لە ڕاستای بەدیهێنانی ئامانجە بەرزەفڕەکانیان کە دەست پێڕاگەیشتنیان بە چەکی ناوکی بوو و بەفیڕۆدانی سەدان میلیارد دۆلار لە داهاتی ئەو وڵاتە و بە بەهای بێ نان و بێکار کردنی خەڵک، سەرئەنجام لە ڕووی ناچاری، ملیان بۆ مەرجەکانی خۆرئاوا ڕاکێشا و ڕێککەوتنێکیان لەگەڵ ئیمزا کردن کە ئاکامەکەی هەڵوەشاندنەوەی هەموو ئەو بەرنامانە بوو کە لەو ماوەیەدا بۆ ئەو مەبەستە بنیادیان نابوو. ئەوەش بە مەبەستی ڕزگارکردنی ڕێژیم لە ژێر قورسایی ئەو گەمارۆ ئابوورییانە بوو کە خۆرئاوا خستبوویە سەر ئێران و بنچینەی ئابووری وڵاتی هەڵتەکاندبوو.

لە هەمان‏کاتدا بە پێچەوانەی چاوەڕوانییەکانی هێندێک لە وڵاتانی خۆرئاوایی، چاوەدێرانی سیاسی و هێندێک لە دەست‏وپێوەندەکانی ڕێژیم، دەسکەوتی هەڵگیرانی گەمارۆکان، دەستی ڕێژیم پڕ دەکا بۆ یارمەتیدانی زیاتر بە گرووپ و هاوپەیمانە تیرۆریستەکانی بە مەبەستی پەرەدانی زیاتری شەڕ، ئاژاوە و ماڵوێرانی لە هەموو شوێنێک بە تایبەت، لە خۆرهەڵاتی نێوەڕاست، بەڵام بەشی خەڵکی ئێران هەژاری، بێکاری و بێ هیوایی دەبێ.

 

لەگەڵ ئەوەشدا ڕامانگەیاندوو بوو کە کرانەوەی ڕێژیم بە ڕووی دنیای دەرەوەدا، هاوکات دەبێ لەگەڵ توندوتیژی و بەستراوە بوونی زیاتری فەزای سیاسیی ئێران، بۆ هەموو ئازادیخوازانی وڵات بە تایبەت بۆ تێکۆشەرانی کورد و باقی نەتەوەکانی ئێران.

ئێستاش بۆخۆتان شاهێدی ڕاستییەکانی دوای “برجام”ن لە نێوخۆی وڵات لە پێوەندی لەگەڵ دەسکەوتی خەڵک لە نێوخۆ و دەرەوەی وڵات لە درێژەدانی یارمەتییەکانیان بۆ کوشتار و ماڵوێرانیی سەدان هەزار کەس لە خەڵکی وڵاتانی سووریە، ئێراق، لوبنان، یەمەن و …  .

ڕووداوێکی دیکەی جێگای سەرنج، وەڕێ‏خستنی دوو شانۆی هەڵبژاردنی مەجلیسی “شوورای ئیسلامی” و “شارەزایانی ڕێبەری” لە سەرەتای ڕەشەمەی ١٣٩٤دا بوو، کە ڕێژیم بۆ جارێکی دیکەش دوای هەرا و بەزمێکی زۆر و پڕوپاگەندەیەکی بەربڵاو بۆ چەواشەکردنی خەڵک لە نێوخۆ و دەرەوە، ژمارەیەکی دیکە لە مۆرەکانی خۆی لەو دوو شوێنە دانان، مەجلیسی شوورای ئیسلامییەک کە بوونێکی ڕواڵەتی و بێ دەسەڵاتە و تەنانەت بە وتەی دەسەڵاتدارانی خودی ڕێژیمیش، هیچ شوێندانەرییەکی لەسەر داڕشتن و چاوەدێریی سیاسەت لەسەر وڵات نیە، مەجلیسی شارەزایانی ڕێبەرییش وەک هەمیشە ملکەچ و چاو لەدەمی وەلی فەقیهن و هیچ دەسەڵاتێکیان بە سەریدا نیە.

ئەو تاقیکارییانە لەسەر قەول و بەڵێنیەکانی دەسەڵاتدارانی ڕێژیم، پڕوپاگەندای بەربڵاو و ڕێکخراو لە لایەن هێندێک لە مۆرە ئاشکرا و نهێنییەکانی کۆماری ئیسلامی، بۆ سەرلێ‏شێواندنی خەڵک و وێناکردنی ڕواڵەتێکی ڕزگاریدەرانە لە تاوانبارترین کەسایەتییەکانی ئەم سیستمە دواکەوتوویە وەک ڕەفسەنجانی، پێمان دەڵێ کە هیوابەستن بە دابینبوونی سەرەتاییترین مافەکانی ئازادی لە ژێر دەسەڵاتی ئەو ڕێژیمەدا بێجگە لە دەرفەت پێدانی زیاتر بە مۆرە  درشتەکانی ڕێژیم بۆ درێژە پێدان بە دەسەڵاتداریی سەرەڕۆیانە و جینایەتکارانەیان، هیچی دیکە نیە.

تاقیکارییەکانی نزیک بە ٤٠ ساڵی ڕابردوو، هەمووی بەڵگەی حاشا هەڵنەگرن کە بە بوونی ئەم ڕێژیمە ئاوات و خەونەکانی خەڵکی ئێران بە تایبەت نەتەوەی کورد نایەتە دی، مەگەر ئەو کاتەی خەڵک یەکگرتوو بێ و یەکگرتووییەکەی بکا بە هێزێکی شوێندانەر بۆ ستاندنی مافەکانی.

پەیامی ئێمە لە جێژنی نەورۆزدا ئەوەیە کە؛ دەنگ و توانامان لە شاخ و شاردا ڕێکبخەین بۆ پێکهێنانی هێزێکی پتەوی چارەنووسساز کە ژیانێکی نوێمان بۆ بنووسێتەوە، ژیانێکی دوور لە ملکەچی و بێ‏مافی.

حیزبی دێموکرات ئەو تواناییە لە نەتەوەی کورد لە ڕۆژهەڵاتدا دەبینێ و لە زۆرێک لە ڕووداوەکانی ساڵانی ڕابردوودا شاهێدی نیشاندانی ئەو توانایانە بووە، بۆیە پێمان وایە کە هەموومان پێکەوە دەتوانین نەورۆز و ساڵی نوێی ١٣٩٥ی هەتاوی بکەینە ساڵێکی جیاواز لە ساڵانی ڕابردوو و بە پەیام و پەیمانێکی هیوابەخش، بۆ ژیانەوەی سەربەرزانە.

لاوانی بەهەست و سەرکوتکراوی خۆرهەڵات !

ئێمە لە جێژنی نەورۆزەدا ئەو پەیامەتان ئاراستە دەکەین و لەبەرداین لەوساڵدا دەرفەتتان بۆ بڕەخسێنین کە لە ساڵی نوێ‏دا پەیوەست بن بە ڕیزی پێشمەرگەکانی دێموکرات بۆ دەستپێکردنەوەی ژیانی سەربەرزانە و بەجێ‏هێشتنی هەرچی سەرشۆڕیی و دواکەوتووییە.

ژنان و کچانی وشیار و مافخوازی وڵاتەکەمان، وەک هەمیشە، لە قوتابخانە، لە شوێنی کار و لە هەر جێگایەک کە هەن، دەتوانن بە پێکهێنانی کۆڕ و کۆمەڵی ئاشکرا و نهێنی، ڕیزەکانیان ڕێکخەن و بە کۆمەڵ بەگژ بەکرێگیراوانی ڕێژیمدا  بچنەوە و، هاواری مافخوازیی خۆیان بە گوێی دنیا بگەیەنن.

ڕووناکبیران، کرێکاران، بازاڕییان و بە گشتی هەموو چین و توێژەکانی کۆمەڵگا پێویستە یەکگرتووانە لە دژی زەوتکردنی مافەکانیان وەدەنگ بێن و تەواوکەری خەباتی ئازادیخوازی یەکتر و خەباتی شاخ بن.

دڵنیاتان دەکەینەوە توندوتیژی ڕێژیم دژ بە ئازادیخوازان نەک نیشانەی هێز و توانا، بەڵکوو نیشانەی ئەوپەڕی ترسنۆکی و نیگەرانی لە خەڵکە، بۆیە خەباتی یەکگرتووانەی ئێوە هێندەی دیکە ورەی ڕێژیم دادەبەزێنێ و داماوی دەکا. بۆ ڕزگاری بێجگە لەوە ڕێگایەکی دیکەمان نیە و ئەزموونی خەباتی کورد لە بەشەکانی دیکەی کوردستانیش هەر ئەو ڕێگایەمان پێ نیشان دەدا.

بە هیوای دەسپێکی ساڵێکی نوێ بە خەباتێکی نوێ و دەسکەوتی نوێ

 ئاگری نەورۆزتان دوژمن سووتێن  و  خەباتتان بەهێز و جێژنتان پێرۆز بێ

هەینی ڕێکەوتی ٢٨ی ڕەشەمەی ١٣٩٤ی هەتاوی

****

روونکردنەوەی حدکا لەسەر قسەکانی ئەم دواییانەی بەڕێز خالید عەزیزی

حدکا: هیوادارین ئەو بۆچوونانە بە دوور بن لە بۆچوونەکانی حیزبەکەی کاک خالید و بەرێزیشی جارێکی دیکە لە ئاکامی نەرێنی ئەو بۆچوون و دەربڕینانە ورد بێتەوە.   

ڕاگەیاندنی پەیامی نەۆرۆزیی بەڕیز سکرتێری گشتی حیزبی دیموکراتی کوردستانی ئێران کە لەگەڵ پێشوازی گەرمی زۆرێک لە چالاکانی سیاسی و توێژە جیاوازەکانی کۆمەڵانی خەڵکی کوردستانی خۆرهەڵات بەرەوڕوو بووە، مشتومڕێکی زۆریشت لە نێو کۆڕ و کۆمەڵ و میدیاکانی ئێرانی لە نێوخۆ و دەرەوەی وڵاتدا پێکهێنا کە هەرکام لە گۆشەنیگای بۆچوون و لێکدانەوەی خۆیان بۆ خەباتی کورد لەو بەشەدا و مافەڕەواکانی، ئەو پەیامەیان لێکدایەوە.

بەشێک لە میدیاکانی فارسی زمان کە وەک هەمیشە نیگەرانی دابەش بوونی خاکی ئێرانن و هەر هاواڕێکی کورد و باقی نەتەوە مافخوازەکانی ئێران و هەرچەشنە خەباتێکی ئەو نەتەوانە نیگەرانییەکانیان بەهێزتر دەکا، بە چاوی گومانەوە هەڵسەنگاندنیان بۆ ئەو پەیامە کرد کە ئێمەش چاوەروانییەکی دیکەمان لەوان نەبوو، چوونکە لە تەواوی مێژووی خەباتی کورد بۆ گەیشتن بە مافە زەوت کراوەکانیداو بەتایبەت خەباتی حەفتا ساڵەی حیزبی دیموکرات، بێجگە لەو تەسک بیرییەیان بیر کردنەوەیەکی دیکەی ئەوانمان لە بواری داننان بە مافی کورد بە قەدەر مافێک کە لەو وڵاتەدا بۆ خۆیانی بە ڕەوا دەزانن و تەنانەت بڕێکیش کەمتر لەوەمان نەدیتوە.

بەڵام ئەوەی ئێمەی هێنایە سەر ئەو باوەڕەی کە سەبارت بەم بابەتە بینە دەنگ،دەربڕینی هێندێک بیروبۆچوون یان باشترە بڵێین دژ کردەوە لە لایەن بەرێز خالید عەزیزییەوە بوو( کە هیوادارین بیروبۆچوونی حیزبەکەی نەبێ). هەرچەند کاک خالید لە وڵامی پرسیارێکی کاناڵی تەلەفزیۆنی “کوردستان٢٤”دا دەڵێ:” ئەو قسانەی لە کۆبوونەوەکەی نوێنەرایەتی حکوومەتی هەرێمی کوردستان لە فەرانسە کردوویەتی لە وڵامی قسەکانی کاک مسەفا هیجری(پەیامەکەی نەورۆز) نەبووە”. بەڵام کێیە کە پەیامەکەی نەورۆزی سکرتێری گشتیی حیزبی دێموکراتی کوردستانی ئێرانی خوێندبێتەوە و گوێی لێ بووبێ و قسەکانی کاک خالید بە وڵامی ئەو پەیامە نەزانێ؟

خۆ ئەگەر کاک خالید بەرپرسایەتیی سیاسی نەبوایەو وەکوو تاکێک بیروبۆچوونی خۆی سەبارەت بەم پەیامە، ئەویش بەو شێوەیە دەربڕیبا جێگای نیگەرانی نەدەبوو و پێویستی بە وڵامدانەوەشی نەدەکرد، هەروەک زۆر کەسی دیکە ئەو پەیامەیان بە ئەرێنی یان نەرێنی هەڵسەنگاندووە و لە دەربڕینی خۆیان ئازادن و قەزاوەتی کۆتایی بۆ خەڵک دەمێنێتەوە بەڵام کاک خالید وەک سکرتێری لایەنێک کە بە دژبەری کۆماری ئیسلامی ناسراوە و دەربڕینەکانی وەک بیروبۆچوونی حیزبەکەی حیسابی لەسەر دەکرێ، ئەو شێوە لێدوان و دەرىرینانە بەدەر لەوەی کە چەند راست یان ناراستن وەک بۆ خۆی دەفەرموێ چەند لەسەر بنچینەیەکی واقعبینانە هەڵچێنراون کە ئەوەش بۆ خۆی جێگای باس و موناقشەیە، لە ناوەڕۆکی خۆیدا هەڵگری چەندین پەیامی نەرێنین:

١-پێکناکۆکییەکان لە نێوەڕۆکدا، کاک خالید هەر بۆ ئەوەی دژ کردەوەی خۆی لەبەرانبەر پەیامی نەورۆزی سکرتێری گشتیی حیزبی دێموکراتدا نیشانبدا و بە خەیاڵی خۆی لە بایەخی ئەو پەیامە کەم بکاتەوە، بەبێ ئەوەی سەرنجی پێویستی دابێتە پەیامەکە، بۆخۆی وایدانەوە کە لەو پەیامەدا حیزبی دێموکرات ڕادەگەیەنێ کە پێشمەرگە دەنێرێتەوە نێوخۆی وڵات بۆ ئەوەی هێرش بکەنە سەر هێزەکانی رێژیم و مەسەلەن گوندێک ئازاد بکەن و … کەوتۆتە نێو لێدوانی پێکناکۆکی بەرفراوان بە مەبەستی رەد کردنەوەی ئەو ئامانجە وەهمییە، بەبێ هیچ پێویستییەک.جا ئەو جار بۆ رەدکردنەوەی ئەو گریمانە وەهمییە، دەکەوێتە ئیستدلال کردن. بەرێزیان لە وتووێژ لەگەڵ کاناڵی”کودستان٢٤” دەفەرمێ: خەباتی چەکداریمان بۆ دەکرێ و قەتیش رەدمان نەکردۆتەوە و لە هەموو دەرفەتێکیش بۆ ئەوە کەلکمان وەرگرتووە. هەروەها دەڵێ: هێزی پێشمەرگەی کوردستان بەرهەمی خەباتێکی دوور و لە مێژینەی حیزبی دێموکراتە و هێزی پێشمەرگە دەبێ بمێنێ و بەهێزتر بکرێ، چونکە خەباتی حیزبی دێموکراتی کوردستان لە دژی کۆماری ئیسلامی خەباتێکی فرە ڕەهەندییە. لە بەشێکی دکەدا دەڵێ:” لە چەند ساڵی رابردوودا پێشمەرگەکانی حیزبی دێموکراتی کوردستان بە شاهێدیی خەڵکی کوردستان لە قووڵایی ناوچەکانی رۆژهەڵاتی کوردستاندا بوون و زەربەیان لە هێزەکانی کۆماری ئیسلامی داوە و شەهیدیشمان داوە”. خۆ ئەوەی کە تا ئێرە کاک خالید باسی کردووە دووپات کردنەوەی پەیامی نەورۆزیی سکرتێری گشتیی حیزبی دێموکراتی کوردستانی ئێرانە بە دەربڕینێکی دیکەوە. ئەگەر ئەو شتانە بۆ کاک خالید و حیزبەکەی رەوایە بۆچی بۆ حیزبێکی دیکە وەک حیزبی دێموکراتی کوردستانی ئێران ناڕەوایە و دەبێ ڕەد بکرێتەوە؟ ئەو حەقانیەت و نا حەقیانە لە چ لۆژیکێکەوە سەرچاوە دەگرێ؟

ئەگەر رەخنەی کاک خالید لەوەیە کە پەیامی نەورۆزیی سکرتێری گشتیی حیزبی دێموکراتی کوردستانی ئێران کە کاک خالید وایدانوە کە شەڕی چەکداری ڕاگەیاندووە و لە شاشەی تەلەفزیۆن ڕاگەیاندراوە، بەڵام ئەون خەباتی چەکداری لە شاشەی تەلەفیۆنەوە ڕاناگەیەنن، ئەدی ئەوە نییە کە قسەکانی خۆی سەبارەت بە پێشمەرگە، خەباتی چەکداری لە نێوخۆی وڵات، زەربەوەشاندن لە هێزەکانی کۆماری ئیسلامی و… لە کاناڵی تەلەفزیۆنی “کوردستان٢٤” ڕادەگەیەنێ و پێشتر لە تەلەفزیۆنی خۆیان”کوردکاناڵ” ئەو چالاکییانەیان بە گەورە کردنەوە و بە شانازییەوە ڕاگەیاندووە؟

لە قسەکانی کاک خالید وا دەردەکەوێ کە حیزبی دێموکراتی کوردستانی ئێران لە ماوەی نزیک بە ٤٠ ساڵی ڕابردوودا کە لەبەشێکی زۆری ئەو ماوەیەدا یەک حیزب بووین تا ئەو کاتەی ئەوان لە حیزب جیابوونەوە، لەوە حاڵی نەبووە کە خەباتی چەکداری “پێویستی بە ئامادەکاری نزیامی” هەیە. هەر لە درێژەی ئەو دێڕەدا دەڵێ:”پێویستی بە هەماهەنگی نێوان لایەنەکان لەگەڵ یەکتری هەیە”.

بێ گومان هەماهەنگ لە نێوان هێزە کوردییەکانی دژبەری کۆماری ئیسلامی کارێکی زۆر باشە، بەڵام یەکەم پرسیارێک کە لێرەدا دێتە پێش ئەوەیە کە ئایا لایەنەکی کاک خالید لەو چالاکییە چەکدارییانەی کە پێشتر ئاماژەی پێکردوون، هیچ هەماهەنگییەکی لەگەڵ لایەنەکان کردووە؟ ئەوەی ئێمە بیزانین لانیکەم لەگەڵ حیزبی دێموکراتی کوردستانی ئێران هیچ هەماهەنگییەکان نەکردووە، ئەگەر لەگەڵ لایەنەکانی دیکە هەماهەنگیان کرد بێ نازانین، بەڵام ویناچێ ئەو هەماهەنگییە کرابێ.

دووهەم، بێجگە لەوە ئایا ئەو شێوە بیرکردنەوەیەی کاک خالید هیچ ڕێگایەک بۆ هەماهەنگی کردن لەگەڵ لایەنەکانی دیکە دەهێڵێتەوە؟

لەو هەموو قسە دژبەیەکانە دەکرێ لە خوێندنەوەی ئەو قسانە لانیکەم دوو پەیام هەڵێنجرێ کە هیوادارین مەبەستی کاک خالید ئەوە نەبوو بێ.:

ئا، ڕێژیمی کۆماری ئیسلامی نیگەران نەبێ چونکە” بەو پرش و بڵاوییەی کە ئێستا لە نێو حیزبە سیاسییەکانی ڕۆژهەڵاتی کوردستان هەیە، خەباتی چەکداری سەرکەوتوو نابێ و لەو دۆخەی ئێستادا تەنانەت ئەگەر بتوانین گوندێکیش رزگار بکەین، زۆر ئەستەمە بتوانین ڕاییگرین و ئیدارەی بکەین”. بەو شێوەیە سەرڕوای پێداهەلکوتنەکانی پێشوو بە پێشمەرگە، هێڵکی باتڵبوونیان بەسەردا دێنێ، چونکە بەبۆچوونی بەرێزیان ئەو شێوە خەباتە”خەباتی چەکداری” سەکەوتوو نابێ.

ب، پەیامێکیش بۆ خەڵکی کوردستانە بەو واتایە کە مادام خەباتی چەکداری سەرکەوتوو نابێ، سەری خۆتان بەردەنەوە و گوێڕایەڵی رێژیمی کۆماری و ڕێنوێنییەکانی ڕێبەری موسولمانانی جیهان(وەلی فەقیە) بن و هێندە خۆتان ماندوو مەکەن، ئەو پەڕەکەی چاو ببڕنە ئاکامەکانی هەوڵ و تێکۆشانی کاربەدەستانی شار و نوێنەران مەجلیسی رێژیم کە داکۆکی لە مافە نەتەوایەتییەکانتان بکەن، وەک ڕێنوێنیانە کە کاک خالید لە پایەمای نەورۆزیی خۆیاندا بەم چەشنە دەیدەن:” هەروەها ئەرک دەخرێتە سەر شووڕای شارەکان،سەر نوێنەرانی کورد لە پەرلەمانی ئێران کە لەوێ نوێنەرایەتی ناوچەکانی خۆیان دەکەن، ئاوڕدانەوەیەکیان لە ناوچکەی خۆیان هەبێ، ئەگەر ئەوان لەوێ هەن لە نەتیجەی دەنگی خەڵکی ناوچەکانی خۆیان لەوێ هەن. سەرڕای تەعەهوداتی ناوچەیی، تەعەهوداتی میللی ئەوان ئەوەیە کە دیفاع لە مافە نەتوایەتییەکانی خۆیان بکەن”.

خۆئەگەر هیچکام لەوانەش کاریگەر نەبوون”خەڵکی کورد لە کوردستانی ئێران حەقی خۆیەتی ئەو مافە بۆ خۆی بێڵێتەوە، کە لە چوارچێوەی مەیدانی نێوەدەوڵەتیش دا قەبووڵ کراو ئێعترافی پێ کراوە شتێکی ئینسانی و قانوونییە،موراجعە بە ڕەئی خەڵکەکەی خۆی بکا، ڕیفراندۆم بکا”( پەیامی نەورۆزی ئەمساڵی کاک خالید عەزیزی).

ئەوەش بەڵێنی قەرزێکە کە بە خەڵک دەدرێ بەبێ ئەوەی کات و چۆنیەتی بەرێوەبردنی دیار بێ، چونکە مادام خەباتی چەکداری سەرکەوتوو نابێ، کاک خالید هەر بە هێزی پارلمانتارانی کورد و ئەجومەنی شارەکان ئەو ڕیفراندۆمە بەسەر کۆماری ئیسلامی دا دەسەپێنێ؟ یان ڕێگای دیکەی هەیە؟ بەم چەشنە دەبینین کە پەیامی نەورۆزی بەرێز کاک خالید و ئەو چەند وتووێژەی دوای ئەوە کە لە رەدی پەیامی سکرتێری گشتیی حیزبی دێموکراتی کوردستانی ئێران کردوویەتی پڕن لە ناکۆکی، چاندنی تۆوی بێ هیوایی و بێ توانایی خەڵکی کوردستانی خۆرهەڵات،

لە لایەکی دیکەوە ورەبەخشین بە کۆماری ئیسلامی لە بەرانبەر زیندوویی و خەباتکاریی ئەو خەڵکە کە لە ماوەی نزیک بە چل ساڵ ستەم و زۆرداریی ئەو رێژیمە دڕندەیە، کۆڵیان نەداوە و باجەکەشیان بە قیمەتی هەزاران شەهید و بریندار و زیندانی و دەربەدەری داوە.

هەروەها ئەو شێوە بۆچوونە بێ قیمەت کردنی خەبات و تێکۆشانی هەزاران پێشمەرگەی ریزەکانی خەبات دژی کۆماری ئیسلامی لە سەرەتاوە تا ئێستایە، بەو پێشمەرگانەشەوە کە لە ریزی حیزبەکەی کاک خالیددا شەهید بوون یان ئەوانەی هەر ئێستا لە ژێر سەرکردایەتی بەرێزیاندا خەبات دەکەن و ژمارەیەکی بەرچاویشیان هەموو تەمەنی لاوەتی خۆیان لەو ڕێگایەدا بە شانازییەوە تێپەڕ کردووە. زیاتر لە هەموو ئەوانەش ئەو بۆچوونانە لەگەڵ ڕۆحی بەرنامەی حیزبەکەی کاک خالید ناتەبایە کە تەنیا چەن مانگ لەوە پێش لە کۆنگرەکەیاندا پەسند کراوە، وەک:” لە فەزایەکی ئاوادا حیزبی ئێمە لەو باوەرەدا بوو کە دەبێ سەرنجی خۆمان و خەڵک و لایەنەکانی دیکەش بۆ ئەو زەروورەتە ڕابکێشین کە وزە و توانای سیاسی و خەباتگێڕیی ڕۆژهەڵات پێش هەموو شتێک بۆ بەهێز کردنی ئەو پارچەیەی کوردستان تەرخان بکرێ”…” ئێمە خۆڕاگری و خەباتی چەکدارانە بۆ خۆمان وەک گەلێکی خاوەن مافی چارەنووس و لەبەرانبەر ڕێژیمێکدا کە لە جیاتی پێکهێنانی دەرفەتی چارەسەری سیاسی بە دڕندانەترین شێوە سەرکووتی دەکا، بە مافی ڕەوا و تەنانەت ئەرکی خۆمانی دەزانین”.

بەڵام واقعییەتەکانی نێو کۆمەڵگای کوردستانی ئێران بە پێچەوانەی ئەوەی کاک خالید لێی حاڵی بووە، بریتییە لە هیواداری بە خەبات، بەربەرەکانێ لەگەڵ رێژیم و ڕەدکردنەوەی سیاسەتە دژی گەلییەکانی حکوومەتی کۆماری ئیسلامی، ئەو واقعییەتانەی تیمەکانی پێشمەرگە لە نێوخۆی وڵات لە ورە و ئیرادەی خەڵک بۆ درێژەدان بە خەبات بە چاوی خۆیان دیتوویانە و بە دڵ دەرکیان کردووە و بێ گومان پێشمەرگەکانی حیزبەکەی، لەگەڵ کاک خالیدیش باسیان بۆ کردووە.

ئێمە لەوە دڵنیان کە خەڵکی کوردستان زۆر لەوە وشیارترن کە بەو جۆرە قسانە لە لایەن هەرکەس و لایەنێک بێ، ورە بەردەن و لە ڕێبازی ڕاستەقینەی خەبات بۆ بەدەستهێنانی مافەکانیان پاشگەز ببنەوە، بەڵام بێ گومان چاوەڕوانیشیان لە حیزبە سیاسییەکانی دژبەری کۆماری ئیسلامی و بەتایبەت ڕێبەرایەتییەکانیان ئەوەیە کە بە داهاتوو هیوادایان بکەن و ورەیان پێ ببەخشن نەک ئیرادەیان تێک بشکێنن و لە ڕابردووی پڕ لە خەات و قوربانیدان پەشیمانیان بکەنەوە، لەو پێوەندییەدا قسە بۆ گوتن زۆرە، بەڵام جارێ ئەوەندە بەسە.

لە کۆتاییدا جارێکی دیکە دووپاتی دەکەینەوە کە هیوادارین ئەو بۆچوونانە بە دوور بن لە بۆچوونەکانی حیزبەکەی کاک خالید و بەرێزیشی جارێکی دیکە لە ئاکامی نەرێنی ئەو بۆچوون و دەربڕینانە ورد بێتەوە.

حیزبی دێموکراتی کوردستانی ئێران

کۆمسیۆنی ڕاگەیاندن

١٥ی خاکەلێوەی ١٣٩٥ی هەتاوی

٣ی ئاپریلی ٢٠١٦ی زایینی

 

نویتـرین هەواڵ و بابەت


فارسی