فڕینی باز، بە باڵی نارنجەک، فەرەیدوون ئەرشەدی

 چۆن نابی بە ئاو ئەی بەرد  

 چۆن؟!

 چۆن نابیتە خۆڵ ئەی با

 چۆن؟!

 نیشتمان

 لاولاوێک سوور پۆشە

 بە سەوڵی نازداری ” سەوڵئاوا“

 هەڵزناو .

 هێندە زام لە لەشی هەنار و دڵی من کەوتوە

 ئەوەندەی نەماوە خاک ببێتە خۆڵەمێش

 چاوی رۆژ کوێر بکات .

 خۆمیش وەک داربلچی قەدپاڵی “کۆساڵان“

 سراپام لە خومێ کەوەدا

 هەڵکێێشم،

 تا ئاسمان بە سەری باراندا

 وەک پشتی پردەکەی ” دووڕۆ“

 نەچەمێ،

 دار بە شوێن چریکەی باڵندەی تەنیا دا

 نەگەریت و

 نەیکاتە خەڵووزی بەر بەفر.

 

لەمدیوی شیوەن و پێکرانی لەشمەوە،

 لە گیانما،

 زایەڵەی سەنتووری ڕاسانە،

 ڕاسانی خوێنی نوێ

 لە لەشی زەمان دا

 بە ئادگاری ئەمڕۆ .

 زایەڵەی هێزێکی لە دەشتی دەستەوەستانیدا

 سەرهەڵداو.

 موژدەی ئەو نەریتەی کە هەرگیز

 داربەڕووە جامانە لە ملەکان

 بە چنگی چڵکنی کڕێوە

 لە ڕیشە دەرنایەن،

 بەردەوام پەل و پۆ

 بۆ تەیری نەوپەرواز

 سەوز ئەکەن .

 

شەڕێکە موقەدەس

 لە نێوان فریشتەی ڕووناکی و ئیبلیسی تاریکی،

 وەک جەنگی گاوەرۆی مانەوە و

 کەویری کاولیی.

 

چەخماخەی ڕوانینی نەسڵێکی تازەیە لە هەور و،

 نەسڵێکی ڕۆچوو تا هەزار توێی کارەسات

 بە هەگبەی ئاخنراو

 بە بەفر و بارانی

 رۆشنایی .

 

گەردەلوولی ڕەشی گوللەیە

 کەژ بە کەژ

 دەلوورێ و کەڵوە لە لاملی جوانووی شاخ

 گیر دەدات .

 کولێرەی رۆنماڵی نهێنی گوندێکی دوورەدەست

 هاوشانی مێوژ و کاکڵە گوێز،

 بە پەلە و کۆمەکۆم

 پشت بەردی هەوراز و باوەشی ئەشکەوتە تەریک و دوورەکان دەگەڕێن،

 ناتوانن پارچەیەک لە توانای ئەوینیان

 بخەنەە نێو زاری کۆڵەپشتییەکانتان .

 ناوساجی لە تەلبەند دەرباز بووی شەوقی شار

 لە جادەی تەنراو بە جاشان دا،

 خۆ دەکا بە بێشەی ئەوبەری رووباردا و

 نەرم نەرم

 بە سەر سینگ،

 تا کەنار کانییەکی بن داربییە شەرمنەکان

 درخزێت و مخابن،

 لەوێ نین.

 هەمدیسان کۆمەکۆم

 بۆ نزیک هەوارە بەرزەکان هەڵدەکشێ و

 ئێوەی لێ دیار نین .

 

ئاشقی ڕەنگتانە بەربەیان !

 لە بنی کام گوڵی دڵماندا

 سەنەگەرتان گرتووە؟

 موبتەلای دەردتانە ئێوارە

 لە کامە خانە باخ

 بارگەتان خستووە ؟

 

“شاڵیار“،

 پیری ئەو بەندەن و چەمانە،

 لە پاشکۆی ئەسپی چاو بە گریەی مەراقیا

 چەند لرفە و چەند زڕەی دەفی سەر دیواری خەڵوەکەی

 بۆ جەرگەی سەنگەرتان دەهێنی و

 ئاگری کاتیوشا

 ناهێڵێ بگاتە دیدارتان.

 

هەم بۆنی شەرمنی چنوور دەیزانی

 بێدارن و نەنووستوون

 هەم چاوە مەستەکانی ترێ.

 هەم دۆانەی ژێر کەپری وەرزێران

 تێگەیشتن چەند تینوون،

 هەم لێوی ئەو کانییە شەنگانەی

 کەوی نێو گەروتان

 نەگەیشتە لێواریان .

 

خەو بە تاو،

 بە خۆی و دەستەیەک لە گوڵە ئەستێرەی ” ئاویەر ” و

 دوو باخی پەرۆشی ” سەروماڵ”

 هاتوون

 تا لە بن دار مازووی وەستاو لە لاشان و

 نووساو بە بڕبڕەی پشتتاندا

 لە باتی دیدەتان

 ئێشک لە ڕێگاکان بگرن و

 ئێوە تا بەربەیان

 دەسماڵی دەور سەر و جامانەی دەور ملی یارتان و

 نەمامی باڵاکەی زاروانانتان

 لە خەونێک ئارامدا

 ببینن .

 

ڕاسانە

 ڕاسانە !

 ئەسپی ئەم ڕاسانە

 بە ناڵی برووسکە و بەیاڵی تریفەوە

 هاتوەتە سەر پاشوو،

 بە دەستی شاخ و شار

 چەپۆکان دەکات و

 خرۆشی سمکۆڵان و حیلەی جەوانی

 دەربەندو کۆڵان و پێدەشت و شەقامی

 تەنیوە .

 

کە ئێوە و قەناسەی قەڵەمتان

 لە بناری ” کێلەشین” بەرەو شار داگەڕان

 هەر بەوری سەر زنارە بەرزەکان زانیان

 چەند ترستان خستوەتە نێو دڵی دێوەزمە و

 چۆن چۆنی

کاڵیسەر“!

 ئەی شاخی تا سەر شان

 بە مشکی و جامانە داپۆشراو!

 تۆ بۆچی گڵۆڵە بەفرێکت

 بە ” کوچک چەرمگ”ی دراوسێت دا

 نەناردە خوارەوە ؟

 تا جەرگی سووتاوی ” هۆزەڵی“

 نەختاڵێک

 پاراو بکات ؟

 

“،

 ئەو کاتەی دوو بازی هەڵبڕاوی کۆساڵان

 بەرانبەر چاوە سەوزەکانی ڕەنجت

 بە باڵی خوێنینی نارنجەک

 هەلفڕین،

 چۆن نەبووی بە دڵۆپێک فرمێسک

 تا لە تەک شەپۆلی شینپۆشی شیوەن دا

 بە ناخی ” سیروان ” دا

 بچیتە

 خوار.

 

ئەی دڵی لە ئاسن خولقاوی نارنجەک

 بۆ نەبووی بە پەڕەی سوێسن و

 بە قژی وەرکەمەر،

 تا ئەوان

 سەر بخەنە سەر شانت و

 لە تریفەی پووشپەڕدا

 سەرخەوێک بشکێنن؟

 

ئەی دایەی بەرچەنە بە مورووی ئاڵ و سوور ڕازاوەی ” نیەر” م،

 کۆڵوانەی چواروەرزی هەڵاڵە لە کۆڵ!

 چۆن نەبووی بە بەڵەد

 ڕێگایەک وەک ڕێگای شاراوەی خەمانت

 بە شەنگە سوارانی ئازادی

 نیشان دەی ؟

 

داخەکەم

 شیعری من نەیتوانی ببێتە مانگە شەو

 بکەوێتە بەردەمیان.

 فیشەکی وشەی من

 نەگەیشتە مەخزەنی تفەنگیان .

 قەڵەمم

 نەگەیشتە سەنگەری تا سەر سینگ بە سروود،

 هەڵچنیویان .

 خۆیشم هەر

 نەگەیشتمە گەورەیی دوا وشەی بریاری

 بە شنەی نارنجەک فڕینیان .

 

ڕەشکەوە سوارەکانی ” شامیان“!

 لەمەودوا

 پاش شریخەی تفەنگ و پەیامتان

 هۆرەیەک لە دەشت و سیاوچەمانەیەک لە هەوار

 نابیسرێ،

 گەر وەسفی ناوتانی تێا نەبێ.

 لەمەودوا

 بێ باسی بارانی هەوری ناو ڕەشتییەکی دەور مل و

 گۆچانی نێو دەستتان،

 نە مەرزەی ” ژاوەڕۆ“

 بەرامەی دەمێنێ،

 نە ئیتر کەلانەی نەوبەهار

 بێ پیچکی پڕ هیوای نیگاتان

 خۆی بەسەر ساجەوە ڕادەگرێ .

 

لەمەو دوا

 قەزوانی پووکەی نێو شەڕەکەی ” دووڕۆ” نەبێ

 دۆی مەشکەی هیچ کچێکی لادێیی

 نە عەتری دەمێنێ

 نە تینگیی دەشکێنێ ،

 بێ شەرحی چۆنیەتی سەفەرتان

 لە قوتابخانەی هیچ شار و گوندێکدا

 وانەیەک لە مانای نەمریی ناخوێندرێ .

 

لەمەودوا

 لەو هەردو کاوانە

 پوشپەر بێ یان مانگی جۆزەردان

 گوڵێک لە خاک سەردەر دێنێ

 بەهار هێشتا نەیبینیوە،

 لە ئەوپەڕی پەرژینی ئەفسانەوە

 هاتوەتەوە،

 لاسک بەرز و چل پەڕەیە،

 گوڵێکی نێو باخچەی دەراخ و ڕەخت و چەکە

 ناوی ئەم گوڵە تازەیە

 گوڵە سوورەی نارنجەکە .

 

لەمەودوا

 لە فەرهەنگی وشەی نوێدا

 نارنجەک ناشرین نییە،

 هاوڕێیەکی بن سەنگەرە و باڵی هەیە

 بازە جەوانەکانی ئەمڕۆ

 بەو باڵانە هەڵدەفڕن .

 

لەو وەختەی بۆ دواجار

 پەنجەتان

 بە قژی خۆڵاویی سەنگەردا گێڕاوە

 تا ئارام بگرێت و لە بەردەم ستەم دا

 نەلەرزێ،

 خوێنیکی پڕ شکۆ بە ڕەگی زەمین دا

 ئەگەڕێ .

 

ئاخر چۆن دەستی مەرگ

 دەگاتە ڕووباری وجوودتان؟

 کەی کەمین دەتوانێ

 چۆک دابات بە بە زناری هەنگاوتان؟

 

بەو گشتە خەندەی وا لە لێوتان رژاوە،

 نیشتمان

 لە جاران زیاتر

 ڕەنگین و خەندان و شیرینە .

 

دێنەوە

 ئەوانەی بۆ چرای ڕۆشنایی رۆشتوون

 هەمیشە دێنەوە،

 لە ڕەنگی گەزیزە و

 لە چرای ماڵان و لە فرینی تەوار و هەڵۆدا،

 دێنەوە .

 ئەوانەی بۆ ژیان مردوون،

 لە تامی ڕێواس و سوورایی هەڵاڵە و ئاگردا،

 سەردانمان دەکەن و

 لە وەرزی ڕاسانا

 داری نێو باخچەکان

 پڕ دەکەن لە شکۆفەی زینگیی .

 

لەمەو دوا

 ساڵ ئیتر لای ئێمە

 پێنج وەرزە و

 ناسینی نوێترین وەرزەکەی ئاسانە،

 نازناوی ئەم ورەزە تازەیە

 ڕاسانە !

وەرگیراو لە فەیسبوەک