"an independent online kurdish website"

ئا: ئاوێنە : سەركردەكانی هەرێمی كوردستان هەمویان محەمەد جەعفەری سەحرارودی دەناسن، ئەو پیاوەی كە هەموو بەڵگەو لێكۆڵینەوەكان پەنجەی تاوانی تیرۆركردنی د.عەبدولرەحمانی قاسملوی لەڤێنا بۆ رادەکێشن،


سەحرارودی لەماوەی 20 ساڵی رابردودا هەر كاتێك هاتبێتە هەرێمی كوردستان، سەركردەکانی یەكێتی‌و پارتی باوەشیان بۆ كردوەتەوەو بەگەرمی پێشوازیان لێكردوە.

بەپێی گێڕانەوەی كرێس كۆچێرای گەورە مێژونوس‌و رۆژنامەنوسی ناوداری فەرەنسی‌و شارەزای كاروباری كوردستان، رۆژی 13ی تەموزی 1989، محەمەد جەعفەری سەحرارودی، جێگری فەرماندەی ئەوکاتی قەرارگەی رەمەزان، لێپرسراوی ئەو تیمە دەبێت كە بەناوی دانوستانەوە ئەركی تیرۆر كردنی د.قاسملوو دو هاوڕێی پێدەسپێردرێت، پاش چەند خولەكێك لەدەستپێكی گفتوگۆكانیان لەباڵەخانەیەكی ڤێنای پایتەختی نەمسادا، كە قاسملو باسی “پێویستی دەستەبەركردنی خودموختاری بۆ کوردستان‌و بەدیهێنانی دیموكراسی بۆ ئێران دەكات”، لەناکاو دەنگی بەریەككەوتنی مێزو کورسییەکان‌و دەنگی کپی هاویژرانی چوار گولە دەبیسترێ‌و ئیدی هیچ…”.

 لەوەختی تەقەکردنەکەدا سەحرارودی بەڕێكەوت یان لەپەلە پەل‌و هەڵگەڕانەوەی گوللە لەو ژورە بچوکەی کارەساتەکەی تیا دەقەومێ، گولەیەك بەر لاملی دەكەوێ‌‌و بریندار دەبێ و لەنەخۆشخانە دەخەوێندرێ، بەڵام پۆلیسی نەمسا ڕێگای دەدا لەنەخۆشخانە بچێتە دەرێ و پەنا بەرێتە بەر باڵیۆزخانەی ئێران لەڤێنا‌و پاش چەند رۆژێك بەدوای ئەوەدا لەئەنجامی مامەڵەیەكدا نەمسا بەرەو ئێران بەجێدەهێڵێ.

 محەممەد جەوادی، یان محه‌مه‌د جه‌عفه‌ری‌ سه‌حرارودی‌، كە ئێستا سكرتێری سەرۆكی شورای ئیسلامی ئێران “عەلی لاریجانی”یە، تەمەنی 62 ساڵەو كوردێكی‌ شیعه‌ی‌ خه‌ڵكی‌ قوروه‌ی‌ نێوان كرمانشان‌و هه‌مه‌دانه‌، هه‌ر له‌سه‌ره‌تای‌ دامه‌زراندنی‌ كۆماری‌ ئیسلامییه‌وه‌ به‌رپرسێكی‌ كارای‌ سوپای‌ پاسدران بووه‌ له‌قه‌رارگه‌ی‌ ره‌مه‌زان‌و پەیوەندییەكی توندوتۆڵی لەگەڵا جەلال تاڵەبانی‌و مەسعود بارزانی هەبووە.

لەدوای راپەرینەشەوە چەندین جار سەحرارودی ئەندامی ئەو وەفدانەی ئێران بووە كە سەردانی هەرێمی كوردستانیان كردوەو لە لایەن تاڵەبانی‌و بارزانییەوە پێشوازی لێكراوە، بە هەمانشێوە هەرجارێك كاربەدەستانی پارتی‌و یەكێتی سەردانی ئێرانیان كردبێت لەگەڵ سەحرارودی كۆبونەوەو دانیشتنیان هەبووە.

 ساڵی 2007، رۆژێك به‌ر له‌هێرشه‌كه‌ی‌ ئه‌مه‌ریكا بۆ سه‌ر كونسولگه‌ریی ئێران لە هه‌ولێر كە پێنج كەسیان تیا دەستگیركرد، سەحرارودی له‌قه‌ڵاچوالان‌و مه‌سیف چاوی‌ به‌هه‌ریه‌ك له‌تاڵه‌بانی‌‌و بارزانی‌ كه‌وت.

محەمەد جەعفەری سەحرارودی، كە ‌ پیاوی متمانەپێكراوی خامەنەئی رابەری كۆماری ئیسلامی ئێرانە، هەمو سەركردەی حزبەكان دەیناسن‌و دەشزانن كە ئەو تۆمەتبارە بەتیرۆر كردنی قاسملو، تەنانەت بەشێكیشیان پێشتر ناوبژیزانی نێوان ئێران‌و حیزبی دیموكراتیان كردوەو لەنزیكەوە ئاگایان لەو تیمە بووە كە بەناوی وتوێژەوە قاسملویان لەڤێنا تیرۆر كرد.

نویترین هەواڵ و بابەت