"an independent online kurdish website
سەرەتای گەلاوێژی ساڵی ١٣٦٨ی هەتاوی بوو. ئێمە وەک کۆمیتەی شارستانی سەڵماس لە ناوچەی سۆما بووینو جارێ هێز و مەڵبەند نەهاتبوو بۆ لای ئێمە.

ڕۆژێکیان من و سادق باقری(ڕووحی شاد) چووینە نوقتەیەکی بڵیند تا لەگەل مەڵبەند تەماس بگرین. سەعات بوو بە پێنج و پەیوەندیمان گرت، کاک تەیموور مستەفایی پەیامێکی نووسیبوو و لە بیرم نیە لە لای ئەوانیش کێ هاتبووە شاخ بۆ پەیوەندی ، پەیامەکەی بۆ خوێندینەوە و نووسیمان. کە هاتینەوە پەیامەکەمان دایە کاک سولێمان کەلەشی بەرپرسی کۆمیتەی شارستان و ئەویش پەیامەکەی کە بە ڕەمز هاتبوو دەرهێنا کە نەمانزانی ناوەڕۆکی پەیامەکە چیە؟
کاک سولێمان، هەردوو ئەندامی کۆمیتە: کاک محمد ساڵح قادری و کاک عەسکەرعەلیزادە ، ی بانگ کردە ئەولاتری ئێمە و هیندەێك قسەیان کرد. دوای تەواوبوونیان کاک محمد ساڵح هات من و کاک فەیسەڵ مەزیدی(ڕووحی شاد) کە هەرسێکمان تیمی تەشکیلاتیی سەڵماس شپیران بووین بانگ کردە ئەولا و گوتی: خۆتان ئامادە بکەن دەچینە فڵانە گوند بۆ مەئموریەتێکی تایبەت . ئەوە بوو خۆمان ئامادە کرد و بەرلەوەی حەرەکەت بکەین ، کاک محمد ساڵح داوای دووربینی لە کاک سولێمان کرد ، بەڵام نەیداینێ وگوتی ئەوە خەریکە شەو دادێ دووربین بەکەلکتان نایە. بە ٣ تیمی تەشکیلاتی ١ دووربینمان هەبوو.
کە چووینە نیزیک ئەو ئاوایە ، جارێ ڕووناک بوو و دانیشتین و نیمچە کۆبوونەوەیەکمان کرد و کاک محمد ساڵح گوتی: مەئمووریەتی ئێمە ئەوەیە کە مەڵبەند و هێز دێنەوە لای ئێمە و هێز داوای کردووە فیشەکیان بۆ بکڕین. ئێمەش لە کۆبوونەوەی ٣ کەسیمان دا بڕیارمان داوە فڵانەکەس کە ئەندامی حیزبە بنێرین بۆ کڕینی فیشەک. من وکاک فەیسەڵ ئەو کەسەمان دەناسی و دەمان زانی کە ئەندامی نهێنی یە. ئەوە بوو ئێمەش گوتمان تەواوە و دەبێ بە دیقەتەوە ئەو ئەرکە جێ بە جێ بکەین. نموونەیەکم باس کرد کە ٢ ساڵ پێشتر هێزی ئاگری فیشەکی کڕیبوو ، هەموویان فیشەکی جووت تەقە بوون، واتە خودی گولە کاتێک لە شوێنی خۆی دەکەوتەوە دەتەقیەوە و ئەو فیشەکانە زۆر خراپ بوون بۆ تفەنگ و هەرتفەنگێک ٢٠٠ دانە لەو فیشەکانەی پێ تەقێندرابایەوە خانەبریش نەبوایە دەچووە سنووری خانەبڕی و بە کەلک نەدەهات . چوونکی توێکڵی گولە مس نەبوو، ئاسن بوو و کەمێکیش ئەستوورتر لە گولەی ئاسایی بوو. بۆیە گوتم دەبێ بەو کەسە بڵێین کە لە پێشان ژمارەیەکی چەند سەد دانەی فیشەک بێنێ تا بیبینین .
دونیا تاریک داهات و چووینەوە ئەو ئاوایە و لە ماڵێک لاماندا و دوای نان و چایەکی بەپەلە، دەورێکمان لە خوارەوەی گوندەکە دا و خۆمان گەیاندە لای ئەو کەسەی کە مەبەستمان بوو مەئمووریەتی فیشەک کڕینی بدەینێ. کە چووین تازە لە شار ڕا هاتبووە و جارێ وەسائیلی لە ماشینەکەی دەهێنایە خوار. و دانیشتین و مەئمووریەتەکەمان پێدا و گوتی هەرچەندتان بوێ فیشەکی کڵاشینکۆف و بی کەیسی تان بۆ دەکڕم. کە پرسیمان وا بە دڵنیاییەوە دەڵێی دەکڕم و هەر چەندتان بوتان دێنم ، لە کوێ دەکڕی؟ وڵامەکەی هەم جێی باوەڕ بوو هەم گومانی دروست دەکرد. گوتی: دوو دۆستی بارزانیم هەیە لە مەڕگەوەڕن و ئەوان بۆم دێنن وامان دانا کە ڕاستە و ئەوان ڕەنگە بتوانن وەها کارێک بکەن. بەڵام دڵنیاش نەبووین کە ئەو بەڕاستی دەچێ لەو کەسانە دەکڕێ یان جێیەکی دیکە؟ . مەبەستیشی لە بارزانی ئەوە نەبوو کە لە عەشیرەی بارزانین، بەڵکوو لە ناوچەی ئێمە هەر کوردێکی عێراقی پارتی بوایە و بە بادینی قسەی کردباوە پێیان دەگوت بارزانی. گوتمان لە پێشان ١٠٠٠ فیشەکی کڵاشینکۆف بێنە با بیان بینین جا دوایە پێت دەڵێین چەند هەزارمان پێویستە. گوتی زۆر باشە و دوو سبەی ئێوارێ چاوەڕێتان دەکەم.
بۆ بەیانی گەڕاینەوە لای هاوڕێیان وئێوارەکەی جێگاکەمان گۆڕی یەوە بۆ شوێنێکی دیکە کە ئەمین تر و قایمتر بوو بۆ مانەوەمان تا ڕۆژەکەی بێت و بچین بۆ وەرگرتنی ئاکامی مەئمووریەتەکەمان. ئەو شەوە لەوێ ماینەوە و زۆر سارد بوو، نە کیسەخەومان هەبوو نە لیباسی گەرم، تەنیا ٣، یان ٤ پەتوویەکمان هەبوو کە شەوانە هەموومان لە بینی دا دەخەوتین و دۆشەکیشمان عەرز بوو. خواردنیشمان هەر ئەو برە نان و پەنیرە بوو کە ئێمە لەگەل خۆمان هێنابوومان و کەم بوو.
پۆستی بەیانی من نیگەبان بووم و تاو هەڵات و هەوا وردە وردە گەرمی دەکرد. هاوڕێیان هەر یەکەم لە جێگایە لەبەر تاو ڕاکشان و خەویان لێکەوت. دیتم ئەوە لە شاخی سەر سەرەوە دەنگی بەرخۆڵەیەک هات. کە چاوم گێرا دیتم بەرخۆڵەیەکی سپی ئەوە هات بۆ سەر ئاو . هات و ئاوی خوارد و لە بن گیا خەوت و ئاگای لە ئێمە نەبوو. دیار بوو ئەو بەرخۆڵەیە دەمێکە ون بووە و زۆر قەڵەویش بوو. ئەوکات مەڕ و ماڵات وەک جەڵەب لەوێ ڕا دەهات و دەچووە باکووری کوردستان، دیار بوو ئەو بەرخۆڵەیە دابڕابوو . هاوڕێیان کە هەستان گوتیان تازە نسیبی ئێمەیە و سەری دەبڕین و دەیخۆین. هەر کە ئاگای لە ئێمە بوو هەڵات و بە کەس نەدەگیرا. ئاخرەکەی لە دەستمان ڕزگاری نەبوو و گرتمان و سەرمان بڕی.
تازە کە ببووینەوە خاوەنی گۆشت و کەباب لەو شاخە و ماوەیەک بوو جگە لە نانی ویشک ، یان نان و پەنیرێک شتێکی دیکەمان دەست نەدەکەوت، ئەو ڕۆژەمان کردە ئێوار و دەبا بڕۆین بۆ قەرارەکەمان. بەڵام ئەوجار بڕیار بوو هەموومان وەک کۆمیتە بڕۆین کە ٩ کەس بووین. دوای نیوەڕۆ گوتمان وردە وردە دەبێ ئامادەبین، کاک سولێمان گوتی ئەوشۆ ناڕۆین ! کە پرسیمان بۆ ناڕۆین وڵامەکەی ئەوە بوو کە ئەوە ئێمەین لە شاخ و کاتمان بۆ گرینگە، ئەو کەسەی کە مەئمووریەتی دراوەتێ لە ماڵە خۆیە و با ڕۆژێك درەنگ بچین بۆ ئەمنیەتیش باشترە لە سەری وەخت نەڕۆین .
بە سەراحەت بڵێم کە هەموومان لەو ئامادەیی دەربڕینەی ئەو کەسە و هەڵسووڕانی بوێرانەی هیندێک بە گومان بووین، بەڵام بەڵگەیەکمان نەبوو تا بۆمان ڕوون بێتەوە کە ئەو کەسە دوولایەنە کار دەکا. کاک سولێمانیش کە گوتی ئەوشۆ ناڕۆین لە هەمان گومانەوە سەرچاوەی دەگرت ، بەڵام وەک بەرپرسێک ئامادە نەبوو بە ڕوونی بڵێ من لەو کەسە بە گومانم. چوونکی لە هەر حاڵ دا کەسی ئاماژە پێکراو ئەندامی حیزب بوو . تەنانەت ئێمە وەک ئەو ٣ کەسەی کە چووبووینەوە ئەو مەئمووریەتە بە کاک سولێمان مان گوت ئەوە دەبێتەوە بەد قەولی بۆ تیمەکەمان و باش نیە . بەڵام ئەو سوور بوو لە سەر ئەوەی کە ئەوشۆ ناڕۆین، بۆیە ئێمەش ئیدی ئیسرارمان نەکرد .
ئەو شەوەش هەر لەوێ ماینەوە و ڕۆژی دوایی ئێوارەکەی ئامادە بووین تا بڕۆینەوە دوای ئاکامی مەئمووریەتەکەمان. بەڵام بەرلە ڕۆیشتن کۆبوونەوەیەکمان کرد و لە بیرمە سادق نیگەبان بوو. لەوێ دا کاک سولێمان گوتی ئەوەی کە دوێنێ نەچووین ڕاستیەکەی من هیندێک لەو کەسە نیگەرانم و ئێستاش کە خەریکە بڕۆین هەر نیگەرانم و دەبێ زۆر وریابین نەکا تووشی داوێک ببینەوە. ئەوە بوو حەرەکەتمان کرد و گەیشتینەوە نیزی ئاوایی ، مانگە شەوێکی ڕووناک بوو. من و محمد ساڵح و سادق بە فاسیلەیەکی تەقریبەن ١٥٠ میتری لە پێشدا دەچووین. گەیشتینەوە قەڕاغ دێ، سەگ وەڕێکی زۆر بوو و دیاریش بوو ئەو سەگانە بە کەسی نیزامی و ئەوانە دەوەڕین. لە پەنا ماڵەکان جۆگە و کەندەڵانێکی ترسناک بوو. هەر ئەوندە بینیمان کەسێک بەرەو ڕوومان هات. دیاربوو کە دایکێکە و چاوەڕیمانە و دیتوونی و بە دڵە پاکەکەی هەستی کردووە کە ئەوە دوو شەوە پشتی سەری یەک گرووهی زەربەت لەو گوندە کەمین دادەنێ و هەتا بەیانی لە کەمین دایە، مومکینە بەرنامە ، یان پیلانێك هەبێ بۆ پێشمەرگە. یانی لە واقیع دا نیگەبانێک بوو تا پێشمەرگە لە مەرگ نیجات بدا. ئەو بە ئەفرادی کەمینی گوتبوو مانگاکانم هاتوون، گوێرەکەی یەکێکیان لەو دۆڵە بەجێ ماوە و دەچم بەڵکوو بێنمەوە. ئەوەش تەنیا بیانووی فیداکاریی ئەو دایکە مێهرەبانە بوو بۆ نیجاتی ڕۆڵەکانی خۆی لە پیلانێكی مەترسیدار.
درێژەی هەیە……….

 

 

 

 

 

نویتـرین هەواڵ و بابەت


فارسی