"an independent online kurdish website"

هەموو دەزانن سەرجەم شۆڕشگێڕان و لـە نـاویـانـدا ڕێبەرانـیـان مـرۆڤـن و مرۆڤیش فرشتە نیە و هەموو شتێک ناتوانێ و ناشزانێ، کەوابوو زۆر ئاساییە لە کار و تێکۆشانیدا توشی هەڵە و پەڵەش بێ،

هەڵەش مانای ئەوەیە نەتزانیوە خراپە و نەشت ویستوە بیکەی و بـەسەری داکەوتـوی. ئـەوەی بـەلای مـنەوە سەیر و جێی سەر سوڕمانە لە پێشدا ئەوەیە: ئێمە ڕێبەرەکانمان دەکەینە فرشتە و چاومان لەوان بڕیوە و هەرچی بەدڵمان نەبوو ئەگەر ڕاستیش بێ وەری ناگرین و وەک عەیب لەناو چاوانیان چەسپ دەکەین! جارێکیش تەماشایەکی خۆمان ناکەین و هەڵەکانی خۆمان نابینین وئەگەر یەکیتریش پێی کوتین وەک دژایەتی حیسابی دەکەین لە حاڵێکدا هەمومان بەشی خۆمان بەر پـرسیارین! لە هەموی ئەوانەش خراپترهێندێک ڕادەوەستن هەتا کەسە کە دەمرێیو ماوەیەکی زۆریشی بەسەردا تێدەپەڕێی ،جا ئەوجار بەهاندانی نەیاران ، یان بـۆ دەربڕینی ڕقو قینی کوێرانە ، یـان بـۆ خۆ ڕانان قەڵەم بەدەستەوە دەگرین و جڵەوی زمانمان بەردەدەین هەرچی نەکراوەو نەکوتراوە لەسەر مردوەکەی حیساب دەکەین. ترسنۆکترین کەس ئەوەیە کە پاش مەرگ عەیبەکانی مردوەکە دەڵێ، دەساڵ پازدە ساڵ، بیست ساڵ بەو عەیب وعارانەوە کارمان دەگەڵ کردون، متەقمان لێنەهاتوەو بـڕیـارەکانیانمان بـەڕێوە بـردوە، کەچی دوای تێپەڕبونی قـەدەر عەیامێکی دوور کەتـێب بـەدوای کتێب دا دەنوسین و ، وتـاران بـڵاو دەکەینەوە وهەرچی لەو ڕابردوەدا کراوە بـاشەکان بـۆخۆمان وەلادەخەێـن وخراپـەکانـیش وەپـاڵ ئـەوان دەدەیـن و زۆر شتی نـەکراوو نـەکوتـراویش هەڵدەبەستین و لێی زیاد دەکەین !! هـیچ بیر لەوە ناکەینەوە لـە حیزبێکـدا کە بڕوای بەئازادی و دێمۆکڕاسی هەبێێ هەمو بڕیارەکان پەسند کراوی کۆنگرەن. ئەندامانی کومەیەتی ناوەندیش هەر لەوێی هەڵدەبـژێر درین و لـە ناو ئەوانیش دەفتەری سیاسی دیسان بەدەنگ بۆ بەڕێوە بردنیان هەڵدەبژێردرێو، کار دابەش دەکرێ. هەربـەشەی دەدرێتە یەکێک لـە ئـەنـدامانی ئـەو دەفتەرەو سکرتێر چاوەدێری بەڕێوە چونیان دەکا ، تەنانەت ئەو دەفتەرەش مەگەر لە حاڵەتی تەنگەتاویدا ئەگینا ناتوانێ بڕیاری بەدەر یان دژ بەبڕیارە پەسند کراوەکانی کۆنگرە دەربکا . بـۆیە پێویستە بـەو هێرشو پەلامارە ناڕەوایانە بکوترێی : ( ئـەرێ ئـەو شێوە هـەڵسو کەوتانـە بـە هـۆی نـەخۆشیە یـان نـەزانیە ؟! ) بەڕای من هەردوکیانە . ئەوانەی لە کاتی خۆی دا بێدەنگن ، ئەوانەش کە ئەو کات کاسەی لەئاش گەرمتر بـون، لە ( ٣) حاڵەت بەدەر نین،( یان ترسنۆکن وغـیرەتی دەر بـڕێنی ڕای خـۆیـان نـیە،) یـان هەلپەرستن، کورد کوتـەنـی ( لەپیکیش دەدەن و لە ماپیکیش دەدەن ) یـان ( نەزانـن هـێچیان نەبوە بیڵێن و ئێستا خۆیان دەدۆڕێنن ، بـۆئەوەی خۆیان بنوێنن) لەڕاستیدا ڕەخنە گرتنی بەجێ نیشانەی زیندو بـونی ئەندامانی هەر حیزبێکە ، بەڵام : چۆن ، لەکوێی و لەکێ . بەڕای من باسی خراپەکانی دوژمن ڕەخنە نیە ، بەڵکو لەقاودانە . بـەڵام ڕەخنە لـە دۆست و ئـاشنـا ڕێـنوێنی و هاوکاریو یـارمـەتی دانـە ، بـەو مەرجەی جێگرەوەی هەڵە، یـان خەتاکەی بـۆ دەست نـیشان بـکەی . ئـەگەر ڕەخنەکەی تۆ جنێوو قسەی نەشیاوو باسکردنی شتی نەکراو بـوو ئەوە ژانە زگە، شکاندنە و لە ئاقڵو مەنتیق بەدورە و کاری قین لەزگێکی هیچ نەزانە.

بەڕێزان : ڕێبەر وەک کوتم فرشتە نیە بەڵام هێندێک تایبەتمەندی و زانستی هەیە کە ڕەنگە لەوانیتردا ئەوانە هومویان نەبن. ئەو شێوە نوسین و ڕادەبڕینە مانای تێنەگەیشتن و بڕوا بەخۆ نەبـون و خۆ بەکەم زانینە. چونکە هەمومان دیتومانە هەموو ڕێبەرایەتی حیزب بەدەنگی نوێنەرانی سەرجەم ئەندامانی ئەو حیزبە هەڵبژێراون ، بە وتەیەکیتر خاوەنی دەنگی هەموئەندامانن . تۆ خۆت ڕێبەرەکەت هەڵبژاردوە ، ئەگەرهەڵەبێ ، تێنەگەیشتن بێ ، یا بەقەولی هێندێکان دەنگەکەت فرۆشتبی ، ئەوە تۆی دۆڕاوی نەک ڕێبەر، چونکە لابردنی ڕێبەر لە حیزبێکدا کە بڕوای قوڵی بەدێمۆکڕاسی هەیە کارێکی هاسانەو لە کۆنگرەی دواییدا دەکرێی . بۆ ناسینی کەسێکیش ماوەی چوار ساڵ بەیەکەوە کار کردن و تاقیکردنەوە زۆرەو کەم نیە . چونکە ئـەگەر لـە پێشذا زانیوتـە ئەو ڕیبەرە ئەوهەمو عەیبەی هەیە ، ئەوە تۆی دەبێ موحاکەمە بکرێی کەدەنگت پێداوە! گومانم لەوەدانیە ئەو جۆرە نوسینو لێدوانانە دژی ڕێبەران دەچنە قالبی هاوکاری ڕاستەو خۆ یان ناڕاستەو خۆ، خوازراو یان نەخوازراو، دەگەڵ دوژمنانی گەل و حێزبەکەمان .

باوەڕم وایە ئێمەی کورد بە هەموو جیاوازیەکانی ئایینی و ئیدەیی و هیتر ، دوژمنی یەکتر نین ، کچان و کوڕانی کورد خوشک و بـرای نـەتەوەیـیـن و هێندێکیشیان ئی ئایینیشن ڕۆڵەی یەک ئاوو خاکن کە ناوی کوردستانە. زیدەکە ئیهەموو دانیشتوانی ڕەسەنی کوردستانە، نەک هاوردەکان. ئازادیو سەربەخۆیی مافێکی حەیاتیو ڕەوای هەمومانە. بۆیە پێویستە هەموو هێزو تواناو زانست و دەرەتانمان بۆ ئازادی وڵات وگەل وەگەڕ بخەین ،هەرکامەمان بە پیی ئیمکان دەست و زمان و قەڵەممان وەگەڕ بخەین . بە نەوەی نوێی بڵێن : ئەگەر لە بیرو بۆچوندا جیاوازیمان هەیە ، لە جەوهەرو ناوەرۆکدا یەکین ، ئەگەر برینەکانمان جیان دەرمانەکەمان هەر یەکە . با هەوڵو تێکۆشآنمان خەبات و خوێن ڕژانمان بۆئازادی نیشتمانو گەل بێ نەک ئایین وئیدەکانمان .هەمووحیزب و باوەڕەکانیان جێگای ڕێزن ، بەڵام لە پێشەوەی هەمویان نیشتمانو گەل شیاوترە قوربانی بۆ بدرێی ، چونکە تەنیا ئازادیو سەربەستیە دەتوانێ ڕێگە بـدا بـۆ نواندنی هەموو ئیدەو ئایینەکانو گەلێکی ئازادە دەتوانێ کامەیان هەڵبژێرێو دەنگی پێبدا.

دەبا جارێک بێلایەنگری و بەسەداقەتەوە مێژوو بخوێنینەوە بزانین کێن بەهۆی خزمەتو فیداکاریو ڕاستگۆییان ڕێزیان لێگیراوە ،کێشن ئەوانەی بەهۆی خەتـاو خەیانەت نەفرینیان لێکراوە . لەوەش گرینگتر ئەو کەسانەی فریو خواردون وهەتڵە کراون و قین لەزگانە و نەزانانە ڕێبەرانی خۆیان بەخەڵک دەناسێنن ، بیانەوێو نەیانەوێی تیری هەوڵ وئاخر هەروەخۆیان دەکەوێی . بەخۆشیەوە گەلەکەمان وشیارەو تیرهاوێژێکی شارەزایە دەزانێێ لە کێ و لەکوێی نیشانە گرتوەو دڵنیایە خاڵە چڵکنەکەی پێکاوە. ئەوانەی باسمان کردن بە پێچەوانەی بیری گەنیوی خۆیان پێیان ناکوتری قارەمان، بەڵکو پێیان دەکوترێ : ترسنۆک، هەلپەرست ، دوو ڕوو، درۆزن و هیچ نەزان . هەر کەس شآنازی بەڕێبەران و ڕابردوی خۆی نەکا ، هەڵەکان نەبینێ و هەوڵ بۆچاککردنی نەدا ، هەرکەس پاشملەو پاش مەرگ نێوو نرتکە لە ڕیبەرو هاوڕیی خۆی هەڵبدا ، هـەرکەس ڕێگای دوژمنایەتی و دوبەرەکی لەناو براو هاوکارو هاو نیشتمانیان دروست بکا بە دڵنیاوە سەوداگەری مایە پوچە ، ئارەقە ژێژی ڕەنج بەخەسارە، مۆری ختاکاری و دژەگەلی بەناوچاوانیەوە دیارە.

لە دوایین قسەم دەڵێم : یەگرتنەوەی هاوڕێانی حیزبی هەموو ئەو قسەو قسەڵۆک و درۆو بوختانانە پاک دەکاتەوە ، بێژەرو نوسەری ئەو بوختان کەرانە ڕیسوا دەکا ، هەقانیەتی خەبات و هیوا بەسەرکەوتن بە هیزو مسۆگەر دەکا. بابـزانین لەو کەلەبەرەی نێوانمان زۆر هەلپەرست خۆیان خزاندۆتە ناو ماڵەکەمان و بۆنە دەسکیسی دوژمنەکانمان. یەک بگرن ،کەلێن نامێنێ ، گرتنی ئەوکەلێنە دوژمن ناهومێد دەکاو دەسکیسەکەش بە سەرشۆڕی دەمرێنێ.

 براتان مەلا ئیبڕاهیمی مەجید پور ٢١ ڕەزبەری ٢٧٢٠ کوردی

  ١٢ / ١٠ / ٢٠٢٠ زایینی

reklam Vimla

نویترین هەواڵ و بابەت