"an independent online kurdish website"

بیرەوەری ٣٧، لە حیزبی دیموکرات دا تەمرینی دیموکراسی دەکرا و لە نێو قەوارەی حیزب دا بۆ ڕعایەت کردن و بەڕێوە چوونی هەوڵ دەدرا ، دەتوانین بڵێن دیموکراسی لە ئاستێکی بەرز دا بە باشی جێگیر کرابوو و بەڕێوە دەچوو .

دیارە کەم و کوڕیش هەبوو، بەڵام لە ڕادەی سەرەوەی حیزب و لە ڕیزەکانی خوارەوە ئەگەر لە شوێنێک پێشێلی دیموکراسی و بەربەستی ئازادی ڕووی بدایە لە کۆبونەوە و کۆنفڕانسەکاندا ڕەخنە دەگیرا و بە گژ ئەو کەس و ئۆرگانانەدا دەچوونەوە کە دەبوونە بەربەست، جا فەرقی نەدەکرد بەڕێوەبەری ئۆرگانێک بوایە یا نەفەری یەکەمی حیزب بوایە یا پێشمەرگەیەکی سادە.

کۆنگرەی دەی حیزب بابەتی یەکگرتنەوە لە گەڵ (ڕێبەرایەتی شۆڕشگێڕ) یەکێک لە باسەکان بوو، هەم نەزەری موافقی لە سەر بوو هەم موخالف، لە واقیع دا حیزب بە سەر دوو جەناحی نێوان بەڕێزان (حەسەنزادە و هیجری) دا دابەش ببوو  لە گەڵ  گەلێک  بابەتی گرنگی دیکەی نێوخۆیی حیزبی.

–  ئەو کات وەک ئەندامی ڕێبەری و ئەندام لە کۆمیسیۆنی سیاسی نیزامی بۆ بەڕێوەبردنی بەشێک لە کۆنفڕانسی ئۆرگانەکانی حیزب ئەرکدار کرابووم، بۆچون و نەزەری دەیان و بگرە سەدان کەس لە کادر و پێشمەرگەکانی مەڵبەندەکانی ١ و٢و ٣ ی جنوب هەر وەها کۆمیتەی شارستانی بانە و کۆنفڕانسی دەفتەری سیاسیم یاداشت کردوە، تێدەکۆشم بە گوێرەی ڕێکەوتی بەڕێوەچوونی کۆنفڕانسەکان ڕاو بۆچوونی هاوڕێیان وەک خۆی،  چۆنیان باسکردوە بە شێوەی زار و زمانی  وتراوی خۆیان بێ دەسکاری بخەمە بەر دیدی ئەو بەڕێزانەی خوازیاری خوێندنەوەی ئەم بابەتانەن، دیارە هەم بۆ ئەو کادر و پێشمەرگانە وەبیر هێنانەوەیەکە کە بۆچونی ٢٥ ساڵ لەوە پێشی خۆیان  دەبیننەوە، هەم بۆ ئەو پێشمەرگە بەڕێزانەی دواتر هاتونەتە ڕیزەکانی حیزب باشە کە ئاگاداری تێکۆشانی ساڵانی پێش خۆیان بن و هەم بۆ کەسانێک کە خوازیای بەشێک لە مێژوی ورد و تاڕادەیەک نەبیستراوی ئەو سەردەمەن.

–  دیارە هێندێک جار ڕووی داوە کەس یا کەسانێک لە دەربڕین دا  توشی هەڵچوون بوون  یا ناوی کەسانێکیان هێناوە لە بەشێک لە وتەکانیان دا کە بۆ نوسین نابێ جگە لەو چەند بابەتە بچووکە هەموو ئەوانی دیکە دەنوسرین.

– کۆنفڕانسی دەفتەری سیاسی بۆ کۆنگرەی ١٠ی حیزب شەوی ٦/١٢/١٣٧٣دەستی بە کار کرد.

کاتەکانی کاری کۆنفڕانس! ئێوارە لە کاتژمێر  ( ٦- ٨) – ( ٩- ١١ ) – ( ١١.٣٠ – ١)ی شەو

–   سەرەتا کاک مستەفا هیجری سکرتێر لە سەر ئەم بابەتانە قسەی بۆ بەشدارانی کۆنفڕانس کرد،

دیموکراسی، مەسەلەی میللی، سوسیالیزمی دیموکرایتک، دروشمی ڕوخانی ڕژیمی ئیسلامی ئێران،

شێوەی موبارزە تا ئێستا لە گەڵ ڕژیم لە مەجموع دا دروست بووە، دەکرێ لە هێندێک مەورد دا ئاڵ و گۆڕ پێک بێنین، ناکرێ هیچ شێوەیەکیان وەلا نێین، ڕێبەرایەتی حیزب لازمە لە نێو خەڵک دا بێت، مانەوەمان لە نزیک وڵات شتێکی حەیاتیە……

–  نەزەر و بۆچونی هاوڕێیان لە سەر تێکۆشان  و کارکردی نێوان کۆنگرەی ٩ تا کۆنگرەی ١٠

– – حسەین نازدار

– حیزب نوختەی بە هێزی زۆرن باسیان ناکەم، بەڵام هێندیک موشکلاتی نێوخۆییشمان هەیە، نائومێدی، چوونە خاریج، تەسلیم بوونەوە، لە ڕیزەکانی خوارەوە گلەیی و گازندە زۆرە، هۆی دەرەکی هەیە وەک درێژ بونەوەی شۆڕش، نەبونی تەنەوع، پلانی دوژمن.

–  هۆیەکانی ناوخۆ، بێ ئیعتمادی یەکێک لە مەسەلەکانە، هەر کەسێک ئیعتمادی پێکرا کاری چاک و خراپی بە یەک چاو چاو لێدەکرێ و بەر عەکس، یا مەسەلەی مەسڵەحەت تەڵەبی، ئینسانی دیموکرات دەبێ تەحەمولی نەزەری غەیری وەک خۆی بکات، سەربەخۆیی بیر کردنەوە شتێکی ئەساسیە، نابێ عیزەتی نەفس و غرور لە نەفەرات بسێنرێتەوە، شەخسیەت پێدان و پێنەدان یەکێک لە موشکلاتە، موحیبەت دەبێ لە برای گەورەوە سەرچاوە بگرێ، سەڵاحیەت و مەسئولیەت! نەفەر هەیە مەسئولیەتی هەیە بەڵام سەڵاحیەتی نیە، سەڵاحیەت بە هێندیک کەس دەدرێ بەڵام کادری دەرەجە چەندەمە، مەشوەرەت نەکردن موشکلەیەکی دیکەی کاری حیزبە، تەشویق و تەمبێ، قەساب دەبێتە نانەوا و نانەوا دەبێتە قەساب، لە سیاسەت دا دەبێ بە قسەی عەقڵ بکەین لە دڵداری دا بە قسەی دڵ.

– – قادر فەتحی

–  خەتە گشتیەکان تەئید دەکەم، لە گەڵ ژن و منداڵی  شەهیدەکان قسە بکرێ بنێردرێنە خاریج، تێکۆشانی حیزب لە دەرەوەی وڵات دەبێ سکرتێر و جێگری سکرتێر زیاتر بچنە دەرەوە، سپاسی حکومەتی عێراق دەکەم کۆمەکی حیزبی کردوە، لە سەر مەسەلەی ڕێبەرایەتی شۆڕشگێڕ (ر- ش)ئەوان دەیانەوێ خەتاکە بخەنە سەر ئەستۆی ئێمە، حیلە شەرعیەکی بۆ بدۆزنەوە دەبێ ئەو موشکلە حەل بکرێ، شێوەی ئاموزشی پێشمەرگە جەدیدەکان بگۆڕدرێن، کەمتر جەزب دەبن، دەکرێ دەزگایەکی ئیزافی ڕادیۆ لە کەرکوک دابنرێ.

– – محەمەد حەسەنپوور

– لە حیزبی ئێمەدا دیموکراسی لەو پەڕی خۆیدا نیە، زیاتر لەوە پێویستمان بە دیموکراسیە، پێویستمان بە دیموکراسیە کە بیکەینە خاڵێکی گرنگ، ئەو وڵاتانەی دیموکراسیان زیاترە وڵاتیان وەزعی باشترە لازمە دیموکراسی بە هێز بکەین، ڕەخنەشمان لێدەگیرێ قەیدی ناکا، خودموختاری لە شەرایتی ئەوڕۆ دا باشە، قسەی برادەران بەرانبەر مەسائیلی نێوخۆیی تەئید دەکەم، پێویستە تازە هاتوەکان ڕابگرین، شێوەی بەربەرەکانێ لە گەڵ ڕژیم، ئێمە زەربە پەزیرین بۆ ماوەیەکی کورت دەچینەوە ناوچە بۆیە  تەئسیری زۆرمان نابێ، لە ناوچە پێوەندی لە گەڵ ئەحزابی سیاسی  نێوخۆ بگرین با بزانین وەزنیان چەندە بەو ئەندازەیە لە گەڵیان بڕۆین مەسەلەی یارمەتی وەرگرتن لە کوردستانی ئێران بۆ ئەوە دەبێ ئیدامەی بدەین یا پاشەکشەی لێبکەین، مەسەلەی لیباس و جێژنانە بوو بە هیچ، وەزعی ماڵی کادر و پێشمەرگە خراپە، بە تایبەت پێشمەرگەی بنکە سابیتەکان، دەبێ موازب بین ئوپوزیسیۆن لە نێو خۆی وڵات خەریکە شکڵ دەگرێ دەبێ پێوەندیان پێوە بگرین.

 – قادر قوربانی

– ناوەندی و جنوبی هیچ مەعنای نیە، هەر کەس کار دەکات دەبێ ئیحتڕامی بگرین، حیزب بەرنامەی بۆ دانیشتوەکان هەبێ، لە سەر پلە دان بە کادرەکانی حیزبی نازانم پلە چۆن دەدرێ؟ دوازدە ساڵە لە یەک پلە دام، مەسەلەی( ڕ-ش) دەبێ کردەوەی ئەوان بناسین لە ڕێبەرایەتی خۆمان قارەمان ترمان نیە، ئەو سێ هاوڕێیە،  وەهاب،  قەدیکورد، سیاوەش دەبا ماڵیان نەڕۆشتبا حیزب یارمەتی دابان

– شاڕوخ تایرنەسەب

– دیموکراسی و خودموختاری تەئید ئەکەم خەباتی چەکداری ڕەد ناکەمەوە بەڵام ئەهەمیەت دان بە شێوەکاری دیکەی موبارزەش زەروریە، خەریکین ئەو تیعداد نەفەراتەی کە هەمانە لە بەینی دەبەین،هەتا لە نێو خۆماندا موبارزە بەو شیوە درێژەی هەبێ ئیمکانی پێشڕەفتمان کەمترە، ئەبێ خەڵک سازمان بدەین،ئەبێ سازماندەهی ئێستامان تێک بدەین، باشۆڕش بکەین حکومەت نەکەین بە سەر خۆماندا، موشکلاتی خۆمان دەتوانین لە جەرەیانی موبارزەدا حەل کەین، حیزب( ڕ.ش ) ی دەر نەکردوە، خۆیان ڕۆیشتون هێندێک شت کە هەیە لە خۆمانی گەورە نەکەینەوە،

– کەریم سەقزی

لە سەر یەک خەتەگشتیەکان تەئید دەکەم ،مەسەلەی لیست نەمێنێ باشە مەسەلەی حەوت ڕۆژ پێشتر خۆ موعەرەفی کردن بۆ ئەندامی ڕێبەرایەتی لازم نیە، مەسەلەی فیدڕاڵی بێتە بەر باس خراپ نیە، لە کۆنگرە گیر و گرفتی نێو خۆییمان یەگجار زۆرە، لە گەڵ هەر کەس قسە دەکەی لە حیزب ناڕازیە، (ئەلف .ح) و( س.ب) شوعار دەدەن کە بگەڕێنەوە ناوچە ،خۆیان حازر نین بگەڕێنەوە لێ پرسینەوە بۆ ئەو جۆرە کەسانە نیە، دابەشکردنی دەسەڵات و سەڵاحیەت فەرق و جیاوازی هەیە، حەیف و مەیلکردنی ئەموالی حیزبی هەیە (س .ئا)سزا دەدرێ بەڵام لەوە گەورەتر وەک مقەڕی هەولێر دەسوتێ هەیئەتی تەبرەئە دانرا، وەزعی ماڵی کادر و پێشمەرگە خراپە، حیزب فکری لێ بکاتەوە بەرپرسی تەشکیلاتی حیزب لە ئوروپا ناتوانێ وڵامدەری ویستەکانی حیزب  بێ ،یەکێک لە ئەندامانی دەفتەری سیاسی بچێتە دەرەوە ببێتە بەرپرسی تەشکیلاتی حیزب .

– خالید گەردی

ئەو قسانەی لە دەرێ دەگوتران دەبێ لێرە بیڵێن، مەسڵەحەتی حیزب لە سەرێ دابنرێ، تەئیدی خەتە گشتیەکان دەکەم،  نابێ خۆمان بە خودموختاریەوە ببەستینەوە، قەید و بەندی دیاری کراو بۆ خۆ کاندید کردن خراپە، نابێ لیست هەبێ، هەمومان یەکتر دەناسین، کۆمیتەی ئامادەکردن شتێکی خراپە، قەید و بەندی دیاری کراو بۆ نەفەرات شتێکی خراپە، ئەهەمیەت بە ئاموزش بدرێ، بە هێز کردنی کۆمیتەکانی حیزب لە دەرەوەی وڵات پێویستیە، کۆنگرە بکرێت بە دوو ساڵ جارێک، ئەو کەسانەی ڕەئی ناهێننەوە دواتر نەکرێن بە مشاویر، هاتنە دەر لە قەڵا، بۆرسی تەحسیلی هات بەڵام دەفتەری سیاسی نەیدا بە کوڕی شەهید ، شەڕمان لە گەڵ (ڕ-ش) ڕاگرت،  دەبێ هەوڵ بدەین یەک بگرینەوە، بە نیسبەت کۆمەڵە لە شەرتەکانمان پاشگەز بوینەوە، هێنانی ماشینی (ڕ-ش) کارێکی خراپ بوو،

– عەبدوڵا ڕەحیمی

موافقی خەتە گشتیەکانم، لە سەر مەسەلەی نەتەوایەتی نەتەوەکانی دیکەی ئێران تەوەجو بکەین، تەئید نەکردنی سەڵاحیەتی ئەفراد لە لایەن کۆمیتەی ئامادەکردنی کۆنگرە نەقسی دیموکڕاسیە، مەسەلەی ئاموزش لە دوبارەوە موهیمە، یەکەم سەواد ئاموزی ،دووهەم ئاموزشی سیاسی،

– سەکینە جەوانمەرد

زوڵم لە ژنان کراوە گەڵاڵەی ئامادە کردنی (نامیلکە)کۆنگرەیان پێنەداین، موخالفی بوونی لیستەم بۆ هەڵبژاردن، ڕادیۆ کوردستان دەنگی زەعیفە، نەفەرات هەیە دەڵێن ئەوانەی دەچنە خاریج خائینن، ئیعتاد خەریکە پەرە دەستێنێ لە حیزب دا، دەفتەری سیاسی دەزانێ بۆ باسیان ناکات، مەسەلەی کوژرانی (ع،ی) شتی تیدایە پەرەوەندەکەی ؟ خەرجی کۆمیتەی ئەمنیەت بێسنوورە هیچی نەکردوە، بۆ فەرق دادەنێن لە نێوان ژنەکان دا ، سیاسی نیزامی پێمان بڵێ شەرایتی کادری شایستە چیە،؟بردنە سەری پلە و پایە لە ڕووی چیە؟ هێندێک نەفەرات لە ژنەکانیان دەدەن …….دەفتەری سیاسی دەبێ ئیجازە نەدات، کارتمان بۆ ژنان چاک کرد بەڵام موخالفەتیان کرد، ڕێگا چارەیەکیش بۆ (ڕ-ش)لە بەر چاو بگرن.

– ئەحمەد قادری

بەشێک لە خەباتی هەر سازمانێک موبارزەی دەروون سازمانیە، لە پێوەندی دەرەوە سەرکەوتو نەبوین،

– ڕەسوڵ عوسمانی

ڕێبەرایەتیەکی باش بۆ کۆنگرەی ١٠ هەڵبژێرین، لە تێکۆشانی دەرەوەی وڵات سەرکەوتو نەبوین، لە کاری تیمی دا لە تەشکیلات زەربەمان خواردوە، ئاموزشی جۆراوجۆرمان هەبێ،دانی پلەی تەشکیلاتی و لێپرسینەوە و مەسئولیەت یەکسان بێت، هێندێک جار بڕێک خەبەری موهیم دێنە پێش حیزب دەبێ بەدەنەی خۆی زوتر ئاگادار بکات(داخستنی ڕادیۆ).سیاسی نیزامی لە جەرەیانی لێپرسینەوەی ساڵانە ڕەخنەی پێشمەرگەکان بە ناوەکانیانەوە بە بەرپرسی ئورگان دەڵێ کە کارێکی خراپە، لیست خراپە، خەباتی چەکداری ئیدامە بدرێ بەڵام شێوەی ئیدامەکەی بگۆڕدرێ، پێشمەرگەی تازە هاتوو بۆ حیمایەی ڕێبەرایەتی دانەنێن،

– حاجی حسەین حەداد

در عفو لزتی ست  —  کە در انتقام نیست.

شتەکانی خۆی بە نوسراوە خوێندەوە، سێ ساڵ جارێک بۆ کۆنگرە زۆرە بکرێ بە دوو ساڵ، بڕیارەکان بادەستە جەمعی بن،

– درێژەی هەیە…..

reklam Vimla

نویترین هەواڵ و بابەت